གནས་བརྟན་བྷ་ཀུ་ལའི་སྤྲུལ་བ་མཚལ་མིན་པ་བསོད་ནམས་བཟང་པོ།

༡༥༽གནས་བརྟན་བྷ་ཀུ་ལའི་སྤྲུལ་བ་མཚལ་མིན་པ་བསོད་ནམས་བཟང་པོ།

ད་ནི་ཡབ་སྲས་དེ་དག་གིས་སློབ་མ༌། བདག་གི་རྩ་བའི་བླ་མ་རྡོ་རྗེ་འཆང་ཆེན་པོ། གནས་བརྟན་བྷ་ཀུ་ལའི་སྤྲུལ་བ་མཚལ་མིན་པའི་འཁྲུངས་ཡུལ་ནི་ཀྱེར་ཕུ། ཡབ་ཐར་པ་བཟང་པོ། ཡུམ་དཀོན་མཆོག་སྒྲོན། གཉིས་ཀྱི་སྲས་སུ་ལྕགས་མོ་སྦྲུལ་གྱི་ལོ་ལ་སྐུ་བལྟམས་སོ།། དགུང་ལོ་ལྔ་ལ་རབ་ཏུ་བྱུང་ངོ༌།། མཚན་བསོད་ནམས་བཟང་པོ་ཞེས་བཏགས་སོ།། དེ་ནས་ཆོས་རྗེ་སངས་རྒྱས་བཟང་པོ་འཇམ་དབྱངས་དོན་གྲུབ་དཔལ་སོགས་ལ། མདོ་རྩའི་གཞུང་འགྲེལ། ཀརྨ་ཤ་དམ་ལ་སོགས་དཔག་མེད་གསན་ནོ།། བྱང་སེང་བ་ལ་འདུལ་བ་ལུང་སྡེ་བཞི་གསན་ནོ།། དེ་ནས་ལྷ་ས་པོ་ཏ་རི་ལ་ས་ཕོ་ཁྱི་ལོར་མཁན་ཆེན་ཡོན་ཏན་རྒྱ་མཚོ་ལ་བསྙེན་རྫོགས་མཛད། མཚན་ནི་ཀུན་དགའ་བསོད་ནམས་བཟང་པོ་ཞེས་བཏགས་སོ།།

གྲུབ་ཆེན་ཡུ་མོའི་སྤྲུལ་པ་ཐང་ཆུང་བློ་གྲོས་དཔལ།

༡༤༽གྲུབ་ཆེན་ཡུ་མོའི་སྤྲུལ་པ་ཐང་ཆུང་བློ་གྲོས་དཔལ།

ད་ནི་གྲུབ་ཆེན་ཡུ་མོའི་སྤྲུལ་པ་ཐང་པོ་ཆུང་བའི་འཁྲུངས་ཡུལ་དབུས་སོ།། ཡབ་རྡོ་རྗེ་རྒྱལ་པོ། ཡུམ་ཆོས་བཟང་མའི་སྲས་ཆུ་མོ་གླང་གི་ལོ་ལ་སྐུ་བལྟམས་སོ།། དེའི་ཚེ་གོམ་པ་གཅིག་བོར་བའི་ཁར་བཞེངས་ནས། ལྷ་རྣམས་ཀྱིས་ཁྲུས་ཆབ་ཕབ། མེ་ཏོག་གི་ཆར་གཏོར། ས་གཡོས་པ་དང༌། པཉ་ཙ་ལི་ཀའི་ལྷའི་གོས་གསོལ་བ་སོགས་ངོ་མཚར་སྣ་ཚོགས་བྱུང་ནས་འདི་སྐད་གསོལ་ཏེ།
ང་ནི་སྔོན་ཚེ་ཡུ་མོར་གྲགས། །
དེང་སང་འདི་ན་དོན་དགུའི་བར། །
བོད་ཡུལ་གནས་སུ་འགྲོ་དོན་བྱེད། །
དེ་ནས་དགའ་ལྡན་གནས་སུ་འགྲོ། །
ཞེས་གསུངས་ནས་བཟུང་སྟེ་ལོ་དྲུག་ལོན་པའི་ཚེ། །སྟོད་ལུང་རྣམ་རྒྱལ་གོང་མའི་མཁན་ཆེན་ཀུན་དགའ་འབུམ་ལས་རབ་ཏུ་བྱུང་སྟེ། མཚན་བློ་གྲོས་དཔལ་ཞེས་བཏགས་སོ།། དེར་ཀ་རི་ཀ་གཞུང་འགྲེལ། སྤྱོད་འཇུག ཚད་བསྡུས། རྣམ་ངེས་ལ་སོགས་གསན་ཅིང་བགྲོ་གླེང་ལ་སོགས་ཆོས་ཀྱི་གྲགས་པ་བྱུང་ངོ༌།། དེ་ནས་ཞྭ་ལུ་དང་གསང་ཕུ། གླིང་སྟོད་སྨད་ཀུན་ལ་གྲགས་པ་མཛད་པས། མཁས་པའི་གོ་འཕང་ཐོབ། དེ་ནས་མཚུར་ཕུར་རང་བྱུང་རྡོ་རྗེ་ལ་གུར་བརྟག་སམ་གསུམ། དོ་ཧ་ལ་སོགས་མང་དུ་གསན་ནོ།། དེ་ནས་གཙང་དུ་བྱོན་ནས་བྲག་རམ་སྙི་ཐང༌། ཁྲོ་ཕུ། གུང་ཐང༌། ར་ལུང༌། རྣམས་སུ་ཕར་ཚད་མངོན་འདུལ། དྲིལ་བུ་སྐོར་གསུམ། དབང་དང་མན་ངག་ཐམས་ཅད་ལེགས་པར་ཞུས་སོ།།

ཤཱཀྱ་བཤེས་གཉེན་གྱི་སྤྲུལ་བ་ཆོས་རྗེ་ཕུན་ཚོགས་དཔལ།

༡༣༽ཤཱཀྱ་བཤེས་གཉེན་གྱི་སྤྲུལ་བ་ཆོས་རྗེ་ཕུན་ཚོགས་དཔལ།

ད་ནི་ཤཀྱའི་བཤེས་གཉེན་གྱི་སྤྲུལ་བ། ཆོས་རྗེ་ཕུན་ཚོགས་དཔལ་བཟང་པོའི་འཁྲུངས་ཡུལ་ནི་འཕན་ཡུལ་ལོ།། ཡབ་སྟོན་པ་དཔལ། ཡུམ་དཔལ་འདྲེན་མའི་སྲས་བཞི་ཡོད་པའི་ཐ་ཆུང་ཡིན་ནོ།། ལྷུམས་སུ་ཞུགས་པ་དང་བལྟམས་པའི་དུས་སུ་དགེ་བའི་ལྟས་སྣ་ཚོགས་བྱུང་ངོ༌།། བྱིས་པའི་དུས་སུ་བྱམས་པ་དང་སྙིང་རྗེ་ཆེ་བ་དང༌། སྔགས་དང་ཕར་ཕྱིན་ལ་མོས་པ་དང༌། ཆོས་མཛད་ཀུན་ལ་གདུང་སེམས་ཆེ་བར་མཛད། དེ་ནས་དགུང་ལོ་བཅུ་བདུན་ལོན་ནས་སྟག་ལུང་དུ་བྱོན་ཏེ། མཁན་ཆེན་རིན་ཆེན་བཟང་པོའི་མདུན་དུ་དགེ་ཚུལ་མཛད་པས། མཚན་ནི་ཕུན་ཚོགས་དཔལ་བཟང་པོ་ཞེས་བཏགས་སོ།། ཀ་རི་ཀ་གཞུང་འགྲེལ་ཡང་དག་པར་གསན་ནོ།། ཡི་གེ་རི་མོ་ལྷ་བྲིས་ལ་སོགས་མཁས་པར་གྱུར་ཏོ།།

ཨརྱ་དྷེ་བའི་སྤྲུལ་པ་གྷ་རུང་ལྷའི་རྒྱལ་མཚན།

༡༢༽ཨརྱ་དྷེ་བའི་སྤྲུལ་པ་གྷ་རུང་ལྷའི་རྒྱལ་མཚན།

ད་ནི་བྲམ་ཟེ་ཨརྱ་དྷེ་བའི་སྤྲུལ་པ་གྷ་རུང་བ་ལྷའི་རྒྱལ་མཚན་གྱི་འཁྲུངས་ཡུལ་ནི། སྡེ་ཐང་ངོ༌། ཡབ་ཡེ་ཤེས་བཟང༌། ཡུམ་དཔལ་བཙུན་མའི་སྲས་སུ་ས་མོ་ལུག་གི་ལོར་འཁྲུངས་སོ།། གཟུགས་མཛེས་པ། རིག་པ་རྣོ་བ། ལུས་ལ་དྲི་བཟང་མང་བར་གྱུར་ཏོ།། གྲུབ་ཐོབ་ཨ་ཙ་ལ་ན་ཐས་དེ་རིང་ན་སྡེ་ཐང་དུ་ཨརྱ་དྷེ་བ་བྱོན་ཡོད་གསུངས་པ་དང༌། དེ་ནས་དགུང་ལོ་ལྔར་ས་སྐྱོང་གི་ལོར། སྐུ་འབུམ་ཐང་དུ་བྱོན་ནས་བླ་མ་དོན་གྲུབ་དཔལ་ལ་རབ་ཏུ་བྱུང་སྟེ། མཚན་ནི་ལྷའི་རྒྱལ་མཚན་དཔལ་བཟང་པོ་ཞེས་བཏགས་སོ། ཀ་རི་ཀ་ལ་སོགས་གསན་ནས་ཚིག་དོན་མ་ལུས་པར་ཐུགས་སུ་ཆུད་དོ།།

ཐོགས་མེད་རྣམ་སྤྲུལ་ཆོས་རྗེ་རིན་ཆེན་ཚུལ་ཁྲིམས།

༡༡༽ཐོགས་མེད་རྣམ་སྤྲུལ་ཆོས་རྗེ་རིན་ཆེན་ཚུལ་ཁྲིམས

ད་ནི་འཕགས་པ་ཐོགས་མེད་ཀྱི་རྣམ་འཕྲུལ་ཆོས་རྗེ་རིན་ཚུལ་བའི་འཁྲུངས་ཡུལ་ནི་བྱང་རྫིང༌། ཡབ་ནི་ལྷ་བཟང༌། ཡུམ་ནི་ལྷ་བཙུན་གཉིས་ཀྱི་སྲས་སུ་ཤིང་མོ་བྱའི་ལོ་ལ་སྐུ་བལྟམས་སོ།། བལྟམས་མ་ཐག་ཏུ་ནམ་མཁའ་ལ་སྒྲ་འདི་ལྟར་གྲག་གོ། ལྷ་བཟང་བུ་ནི་ཐོག་མེད་དེ། །དེ་ལ་འབྲེལ་བ་གང་ཡོད་པ། །འཁོར་བའི་གནས་གྲོལ་ཡེ་ཤེས་ཐོབ། །མཆོག་རྙེད་ཞི་བའི་གནས་སུ་འགྲོ། །ཞེས་སོགས་དང་འཇའ་འོད་མེ་ཏོག་གི་ཆར་འབབ། དེ་ཡང་གཟུགས་བཟང་བ། གསུང་སྙན་པ། རིག་པ་གསལ་བ་གཅིག་བྱུང་ངོ༌།། ཡི་གེ་ཀློག་འདོན་པ་ཡང་མཁས་སོ།།

འཇམ་དཔལ་རྣམ་སྤྲུལ་སྨན་ཆུ་ཁ་བ་བློ་གྲོས་རྒྱལ་མཚན།

༡༠༽འཇམ་དཔལ་རྣམ་སྤྲུལ་སྨན་ཆུ་ཁ་བ་བློ་གྲོས་རྒྱལ་མཚན།

ད་ནི་འཇམ་དཔལ་གྱི་རྣམ་འཕྲུལ་ཆོས་རྗེ་སྨན་ཆུ་ཁ་བའི་འཁྲུངས་ཡུལ་ནི། སྐྱི་ཤོད་སྟོད་ལུང༌། ཡབ་ཞང་ཀུན་བཟང༌། ཡུམ་ལུ་གུ་འཛུམ་གྱི་སྲས་སུ་ས་ཕོ་སྟག་གི་ལོར་ངོ་མཚར་བའི་ལྟས་དང་བཅས་ཏེ་སྐུ་བསྟམས་སོ།། དེ་ཡང་སྐྱེ་གཟུགས་མཛེས་པ། རིག་གསལ་བ། ཤེས་རབ་ཆེ་བར་གྱུར་པ། དགུང་ལོ་ལྔ་ལ་ཟློས་གར་བཟོ་དང་སྒྱུ་རྩལ་ལ་མཁས་པར་གྱུར་ཏོ།།
          དགུང་ལོ་བརྒྱད་དུ་ལྷ་བཟོ་ཡིག་བྲིས་ཀློག་ལ་མཁས་བར་མཛད་དོ།། དགུང་ལོ་བཅུ་གསུམ་གྱི་ས་ཕོ་སྟག་གི་ལོར་གསང་ཕུར་བྱོན་ནས། གླིང་སྨད་པ་ཕྱོགས་རྒྱལ་གྱི་མཁན་པོ་མཛད། གཞོན་ནུ་སེང་གེའི་སློབ་དཔོན་མཛད་དེ། དགེ་ཚུལ་བླངས་ནས་མཚན་ནི་བློ་གྲོས་རྒྱལ་མཚན་ཞེས་བཏགས། དགེ་ཚུལ་གྱི་ལེའུ་ལྔ་པ་དང་སུམ་བརྒྱ་པ། འདུལ་བ་ལུང་སྡེ་བཞི་སོགས་གསན་པ་མཛད་དོ།། དགུང་ལོ་སོ་གསུམ་ལོན་ནས་ཚད་མ་རྣམ་ངེས་ཀྱི་ཚིག་དོན་མ་ལུས་པ་ཐུགས་སུ་ཆུད་དོ༎ རྩོད་རྒྱལ་བ་ཞེས་པའི་གྲགས་པ་བྱུང་ངོ༌།། གླིང་སྟོད་པ་ཤེས་རབ་བཟང་པོ། གླིང་སྨད་པ་བློ་གྲོས་རྒྱལ་མཚན་གཉིས་རྩོད་པ་ལ་འགྲན་ཟླ་མེད་དོ།། ཞེས་གྲགས། འོན་གྱང་གླིང་སྟོད་པ་ཞན་འདུག་ཟེར། ཕར་ཕྱིན་འོད་ཟེར་མགོན་པོའི་ཊྭི་ཀ་གསན་ནས་ཐུགས་སུ་ཆུད་དོ།།

རིན་བཟང་རྣམ་སྤྲུལ་ཐང་ཆེན་ཀུན་དགའ་འབུམ།

༩༽ལོ་ཙ་བ་རིན་ཆེན་བཟང་པོའི་རྣམ་སྤྲུལ་ཐང་ཆེན་ཀུན་དགའ་འབུམ།

ད་ནི་ལོ་ཙྪ་བ་རིན་ཆེན་བཟང་པོའི་རྣམ་འཕྲུལ་ཐང་པོ་ཆེ་བའི་འཁྲུངས་ཡུལ་ནི་གླིང་སྟོད་དོ།། ཡབ་ཚུལ་ཁྲིམས་རྒྱལ། ཡུམ་ལྷ་ཟ་འོད་ལྕམ་མོ།། ལྕགས་མོ་ལུག་གི་ལོར་སྐུ་བལྟམས་སོ།། སྒྲ་དང་འཇའ་འོད་མེ་ཏོག་གི་ཆར་བབ། གཟུགས་བཟང་བ། ཡན་ལག་མཛེས་པ། ཞབས་ལ་འཁོར་ལོའི་མཚན་པ། གསུང་སྙན་པས་ཡུལ་མི་ཐམས་ཅད་དེ་ལ་དགའ་བར་གྱུར་ཏོ༎ གང་མཐོང་བ་ཙམ་གྱིས་ནད་དང་དབུལ་བ་ཐམས་ཅད་མེད་པར་གྱུར་ཏོ།།
          ལོ་བདུན་ལོན་ནས་གསང་ཕུ་རུ་ཕྱིན་ཏེ་བླ་མ་བཀྲ་ཤིས་བཟང་པོ་ལ་རབ་ཏུ་བྱུང་ནས་ཀུན་དགའ་འབུམ་ཞེས་མཚན་བསྒྱུར། ཀ་རི་ཀ་ལྔ་བཅུ་པ་དང༌། སུམ་བརྒྱ་བ་དེའི་འགྲེལ་བ་དང་བཅས་པ་གསན་ནས་མཁས་པར་མཛད་དོ།། བགྲོ་གླེང་ཡང་དག་པར་དགའ་རབ་ཆགས། སྟོན་པ་བཟང་པོའི་ཚད་རྡོར་གྱུར་ཏོ།། ཡབ་ཡུམ་གཉིས་དང་སྤུན་ཡ་ཕུ་ནུ་རྣམས་དགའ་ཚོར་བྱེད་དོ།། དེ་ནས་དགུང་ལོ་བཅུ་གཉིས་སུ་གུང་ཐང་ཆོས་འཁོར་གླིང་དུ་བྱོན་ནས་བླ་མ་དོན་གྲུབ་དཔལ་ལ། ཕར་ཚད་གཉིས་ལོ་བཞི་གསན་ནས་ཚིག་དོན་མ་ལུས་པ་ཐུགས་སུ་ཆུད་དོ།།

འཇམ་དཔལ་རྣམ་སྤྲུལ་ཉ་དབོན་ཀུན་དགའ་དཔལ།

༨༽འཇམ་དཔལ་རྣམ་སྤྲུལ་ཉ་དབོན་ཀུན་དགའ་དཔལ།

ད་ནི་འཇམ་དཔལ་གྱི་རྣམ་འཕྲུལ་ཆོས་རྗེ་ཉ་དབོན་པའི་འཁྲུངས་ཡུལ་ནི་ཉང་པའོ།། ཡབ་རྣམ་རྒྱལ་དང༌། ཡུམ་པདྨ་སྒྲོན་ནོ།། ཤིང་མོ་བྱའི་ལོ་ཐ་སྐར་ཟླ་བའི་ཚེས་བརྒྱད་ལ་སྐུ་འཁྲུངས་སོ།། འཁྲུངས་མ་ཐག་ཏུ་ནམ་མཁའ་ལ་ཨ་ར་པ་ཙ་ནའི་སྒྲ་སྒྲོག། ས་གཡོས་འཇའ་དང་རོལ་མོ་སྒྲོགས་ཤིང༌། དེ་ནས་བཟུང་སྟེ་ཡུལ་དུ་ལོ་ལེགས། དུས་འཁྲུག་ཆད། ནད་ཡམ་ཞི་བ་སོགས་ངོ་མཚར་དཔག་མེད་བྱུང་ངོ༌།།
          ལོ་གསུམ་ལོན་ནས་མཚན་བརྗོད་འདོན་པ་དང༌། ཡུལ་མི་རྣམས་འདི་ནི་རིགས་བཟང་གཅིག་ཡིན་ཞེས་གླེང་ངོ༌།། ལོ་བཞི་ལོན་ནས་ཇོ་ནངདཔལ་དུ་ཡོན་ཏན་རྒྱ་མཚོའི་མདུན་དུ་མི་སྡེ་ལྷ་སྡེ་རྣམས་ནས་ཆོས་གྲར་མ་བུ་གཉིས་ཕྱིན་པར་ཆོས་རྗེས་སྤྱན་ཅེ་རེར་གཟིགས་ནས། ཕྱག་འཛུབ་བསྟན་ནས་བཞད། འཇམ་དབྱངས་གསར་མའི་སྐུ་སྐྱེས་ཡིན་ཞེས་ལུང་བསྟན་ཏོ།། དེ་ནས་ས་སྐྱར་བྱོན་ནས་ཡི་གེའི་གྲྭ་ལ་འཇུག་ཅིང་ཤེས་རབ་ཕུལ་དུ་ཕྱིན་པར་གྱུར་ཏོ།། གཞུང་ཆེན་ཚད་མ་རིག་པའི་རྒྱན་དགུང་ལོ་བདུན་པ་ནས་ཁོང་དུ་ཆུད་དོ།། དེའི་དགོངས་དོན་ཞོར་ལ་མཁྱེན་ཏོ།། དེ་ནས་མངོན་པའི་གཞུང་ཚར་གཅིག་ཉན་པས་ཚིག་དོན་ལེགས་པར་བློ་ལ་ཟིན་ཏོ།། ལོ་ལྔའི་བར་དུ་ཕར་ཚད་མངོན་འདུལ་གྱི་གཞུང་འགྲེལ་ཁོ་ན་ལ་སློབ་གཉེར་དྲིལ་བས། ཤིན་ཏུ་མཁས་པའི་གྲགས་པ་བྱུང་ངོ༌།།

གསང་བདག་རྣམ་སྤྲུལ་ཞིང་སྟོན་བསོད་ནམས་གྲགས་པ།

༧༽ གསང་བདག་རྣམ་སྤྲུལ་ཞིང་སྟོན་བསོད་ནམས་གྲགས་པ།

ད་ནི་གསང་བའི་བདག་པོའི་རྣམ་འཕྲུལ། ཞིང་སྟོན་རྒྱ་བོ་ཞེས་བྱ་བ་ནི། ཡབ་ཆོས་རྒྱལ་དཔལ། ཡུམ་ཆོས་ཀྱི་སྒྲོལ་མ། འཁྲུངས་ཡུལ་ནི་སྐྱི་ཤོད། དེ་ཡང་ལྷུམས་སུ་ཞུགས་མ་ཐག་ཏུ་ཡུམ་གྱི་མཛེ་ནད་ཕྲོག་ཅིང༌། ལུས་མཛེས་ཤིང་སེམས་བདེ་བར་གྱུར་ཏོ།། ལྕགས་ཕོ་འབྲུག་གི་ལོ་ས་ཀའི་བཅོ་ལྔ་ལ་སྐུ་བལྟམས་སོ།། གཟུགས་མཛེས་པ། སྟོབས་ཆེ་བ། གསུང་སྙན་པ། རིགས་བཙུན་པ་བྱུང་ངོ༌།།
          དགུང་ལོ་དྲུག་ལོན་ནས་ཡར་པོ་གྲ་ཐང་དུ་ཕྱིན་ནས། རྡོ་རྗེ་རྒྱལ་མཚན་ལ་ཆོས་བསླབས་པས། ཟླ་བ་གཉིས་ནས་ཡོན་ཏན་དགའ་རབ་ཆགས་ཤིང་བལྟ་བའི་འོས་སུ་གྱུར་ཏོ།། དེ་ནས་རི་བོ་དགའ་ལྡན་དུ་ཕྱིན་ནས་ཀུན་སེང་ལ་སོགས་རྩོད་ངར་ཆེ་བ་ཀུན་སྡོད་ནས། ལུང་རིགས་ཀྱི་བགྲོ་གླེང་བྱེད་པ་ལ། ལན་མེད་དུ་ཕམ་པར་མཛད་ནས་ཁོང་ཚོ་ན་རེ་བཙུན་ཆུང་གཅིག་ལ་འཁོར་གསུམ་ཁུར་དུ་བཅུག་འང་ཟེར་བ་དང༌། དེ་ནས་ལྷ་སར་བྱོན་ནས་ར་སའི་བཅོམ་ལྡན་འདས་ཀྱི་མདུན་དུ་མཁན་ཆེན་གཞོན་ནུ་དཔལ་ལ་དགེ་ཚུལ་མཛད་པས། མཚན་བསོད་ནམས་གྲགས་པ་དཔལ་བཟང་པོ་ཞེས་བཏགས་སོ།། ཀ་རི་ཀ་རྣམ་གཉིས་གཞུང་འགྲེལ་རྣམས་གསན་ཅིང་ཐུགས་སུ་ཆུད་དོ༎

ཀུན་བཟང་རྣམ་སྤྲུལ་འབྲི་གུང་ལོ་ཙ་མ་ཎི་ཀ་ཤྲཱི

༦༽ཀུན་བཟང་རྣམ་སྤྲུལ་འབྲི་གུང་ལོ་ཙ་མ་ཎི་ཀ་ཤྲཱི

ད་ནི་འཕགས་པ་ཀུན་ཏུ་བཟང་པོའི་སྤྲུལ་པ། འབྲི་གུང་ལོ་ཙ་བའི་འཁྲུངས་ཡུལ་ནི། གྱེར་ཕུ། ཡབ་ཕུ་རང་རྡོ་རྗེ་བློ་གྲོས། ཡུམ་ལྷ་བཙུན་མ་གཉིས་ཀྱི་སྲས་སུ་ས་མོ་གླང་ལ་ངོ་མཚར་དུ་མ་དང་བཅས་ཏེ་སྐུ་འཁྲུངས་སོ།། དགུང་ལོ་གསུམ་ནས་སཾ་ཀྲི་ཏའི་སྐད་ཀྱིས་བྱིས་པའི་ཚོགས་ལ་བཟང་སྤྱོད་ཐུགས་ལ་འཆདདོ།། ཡུལ་མི་དག་གིས་མི་གོ་ཡང༌། རྒྱ་གར་འཕགས་པའི་ཡུལ་དུ་པཎྜི་ཏ་ཡེ་ཤེས་བཟང་པོས་གསན་པ་དང༌། དེ་ནས་བཟུང་སྟེ་དགུང་ལོ་བདུན་གྱི་བར་དུ་ཡབ་ཀྱི་ཡི་གེ་བསླབ་པས་ཀློག་མཁས་པར་མཛད་དོ།། དགུང་ལོ་བཅུ་གཅིག་ཏུ་གསང་ཕུར་བྱོན་ནས། བླ་མ་ཡེ་ཤེས་བཟང་བོ་ལས་དགེ་ཚུལ་མཛད་པས་མཚན་ནོར་བུ་དཔལ་ཡེ་ཤེས་ཞེས་བཏགས་ནས། ཀ་རི་ཀ་གཞུང་འགྲེལ་ཐམས་ཅད་ཁོང་དུ་ཆུད་དོ།།

སའི་སྙིང་པོའི་སྤྲུལ་པ་ཆོས་རྒྱལ་ཕྱོགས་ལས་རྣམ་རྒྱལ།

༥༽སའི་སྙིང་པོའི་སྤྲུལ་པ་ཆོས་རྒྱལ་ཕྱོགས་ལས་རྣམ་རྒྱལ།

དེ་ནས་འཕགས་པ་སའི་སྙིང་པོའི་སྤྲུལ་པ། ཕྱོགས་ལས་རྣམ་རྒྱལ་གྱི་འཁྲུངས་ཡུལ་ནི་མངའ་རིས། ཡབ་སྦྱིན་པ་དཔལ། ཡུམ་ཏིང་འཛིན་སྒྲོལ་མ་ཞེས་བྱ་བ་དབེན་པ་ཉམས་དགའ་བའི་ནགས་ཚལ་དུ་མེ་ཕོ་རྟའི་ལོ་ས་ག་ལ་སྐུ་བལྟམས་སོ།། དེའི་ཚེ་ན་བྱ་སྣ་ཚོགས་བས་བསུས་ནས་སྐད་སྙན་པ་སྒྲོགས་ཤིང་འཇའ་འོད་དང་ས་གཡོས་སོ།།
          དགུང་ལོ་བཞི་ལོན་ནས་དགེ་སློང་རིན་ཆེན་རྡོ་རྗེ་ལ་ཡི་གེ་སློབ་པས་ཀློག་མཁས་པར་གྱུར་ཏོ།། སྤྱོད་འཇུག་ལ་གཟིགས་པ་ཙམ་གྱིས་གོ་དོན་ཡང་དག་པར་སྐྱེས་སོ།། དེ་ནས་མཚོ་མ་བང་འགྲམ་དུ་རི་བའི་བླ་མལ་པྲ་འབེབས་བརྒྱད་བསླབ། དེ་ནས་ཆོས་རྗེ་རཏན་བྷོ་དྷི་ལ་རྡོར་ཕྲེང་གི་དབང་ཞུས། དེ་ནས་པཎྜི་ཏ་ཨུ་མ་པ་ཏི་ལ་ལེགས་སྦྱར་གྱི་སྒྲ་དང་སཾ་ཀྲི་ཏའི་སྐད་བསླབས་སོ།།

བྱམས་པའི་རྣམ་འཕྲུལ་ས་བཟང་མ་ཏི་པཎ་ཆེན།

༤༽བྱམས་པའི་རྣམ་འཕྲུལ་ས་བཟང་མ་ཏི་པཎ་ཆེན།

དེ་ནས་རྒྱལ་བ་བྱམས་པའི་རྣམ་འཕྲུལ་ས་བཟང་མ་ཏི་པཎ་ཆེན་ཞེས་བྱ་བའི། འཁྲུངས་ཡུལ་ནི་མངའ་རིས་ཞེས་བྱ་བ་ལ། ཡབ་བཟོད་པ་དཔལ། ཡུམ་པདྨ་བཙུན་ཞེས་བྱ་བ་རིགས་མཐོ་ལ་འབྱོར་བ་རྒྱས་པ་བསོད་ནམས་ཆེ་བའི་སྲས་སུ། ངོ་མཚར་བའི་ལྟས་དང་བཅས་ཏེ། ཤིང་ཕོ་རྟའི་ལོ་ལ་སྐུ་བལྟམས་སོ།། བཙས་མ་ཐག་ཏུ་གོམ་པ་གསུམ་བོར་ནས་བཞེངས་ཏེ། དགའ་ལྡན་གྱི་ལྷ་དག་གིས་ཀྱང་ཁྲུས་ཆབ་གསོལ་ནས། སྐུ་ལ་འཇའ་འོད་བསྐོར་ནས་སྨྲས་པ། དགའ་ལྡན་བྱམས་པའི་ཏིང་འཛིན་དང་བསིལ་བས། །ཉོན་མོངས་ཚ་གདུང་འགྲོ་བ་ཀུན་སྐྱོབ་ཅིང༌། །མི་ལོ་བརྒྱ་ཕྲག་ལྷག་པར་བོད་ཁམས་སྐྱོང༌། །དེ་ནས་འཆི་ཚེ་དགའ་ལྡན་གནས་སུ་འགྲོ། ཞེས་གསུངས་པའི་ཚིགས་བཅད་ཕྱོགས་བཅུའི་སངས་རྒྱས་ཀྱི་ཞིང་ཐམས་ཅད་དུ་གྲགས་ནས་བྱང་ཆུབ་སེམས་དཔའ་རྣམས་ཀྱིས་མེ་ཏོག་གཏོར་རོ།།

སྒྲིབ་སེལ་སྤྲུལ་བ་ལོ་ཙ་བློ་གྲོས་དཔལ།

༣༽ སྒྲིབ་སེལ་སྤྲུལ་བ་ལོ་ཙ་བློ་གྲོས་དཔལ།

དེ་ནས་འཕགས་པ་སྒྲིབ་པ་རྣམ་སེལ་གྱི་སྤྲུལ་བ། སྒྲ་བསྒྱུར་ཆོས་ཀྱི་རྒྱལ་པོ་ནི། ཡབ་ཡེ་ཤེས་བཟང་པོ་དང་ཡུམ་ལྷ་མོ་སྦྱིན་དགའ་ཞེས་པའི་སྲས་སུ་ཆུ་ཕོ་རྟའི་ལོར། ཡུལ་མདོ་སྨད་དུ་སྐུ་འཁྲུངས་སོ།། དེའི་ཚེ་ནམ་མཁའ་གཡའ་དག་པ་ལ་འཇའ་འོད་དང་མེ་ཏོག་རོལ་མོ་སོགས་ངོ་མཚར་དཔག་མེད་བྱུང་ངོ༌།། སྐུ་གཟུགས་མཛེས་པ་དང༌། ངག་སྙན་པ་དང༌། བློ་གསལ་བ་དང༌། སྙིང་རྗེ་ཆེ་བ་སོགས་ཡོན་ཏན་དཔག་ཏུ་མེད་དོ།། དགུང་ལོ་གཅིག་ནས་ལྔའི་བར་མའི་ནུ་ཞོ་མི་གསོལ་བ་དང༌། མ་ཎི་དང་ཆོས་སྒྲ་ཕལ་ཆེར་གསུངས་པ་དང༌། དགུང་ལོ་བདུན་ནས་བླ་མ་དཔང་རྫོང་པའི་མདུན་དུ་གདན་དྲངས་ནས། ཀློག་མཁས་ཤིང་སྡུད་པ་བློ་ལ་ཟིན་ཅིང༌། བརྟག་གཉིས་དང་གཤེད་སྐོར་ལ་གོ་རྟོག་བཟང་ཚན་སྐྱེ་བས། སྤྲུལ་སྐུར་འདུག་ཅེས་པའི་གྲགས་པ་བྱུང་ངོ།། དགུང་ལོ་བརྒྱད་ནས་གུར་སམ་བྷུ་ཏྲི་སྤྱོད་འཇུག་ཀ་རི་ཀ་གཞུང་འགྲེལ་གསན་ནས་མཁས་པ་ཐོས་ཆོག་པ་ཞེས་གྲགས་སོ།། དགུང་ལོ་དགུ་ནས་རྟ་ནག་ཏུ་བྱོན་ནས་མཁན་ཆེན་པའི་དྲུང་དུ་དགེ་ཚུལ་མཛད་པའི། བློ་གྲོས་དཔལ་བཟང་པོ་ཞེས་མཚན་བཏགས་ཤིང་སོ་ཐར་གྱི་བསླབ་བྱ་ཐམས་ཅད་གསན་ནས། སྡོམ་ལྡན་དུ་གྲགས་ཤིང༌། གསང་ཕུར་བྱོན་ནས་མཁན་ཆེན་ཚུལ་ཁྲིམས་བཟང་གི་མདུན་དུ། ཕར་ཚད་མངོན་གསུམ་གྱིས་ཆོས་དྲིལ་བས་དགུང་ལོ་བཅོ་ལྔ་ལ་མཁས་པར་གྲགས་སོ།།

ནམ་སྙིང་སྤྲུལ་པ་ཀུན་སྤངས་ཆོས་གྲགས་དཔལ།

༢༽ནམ་སྙིང་སྤྲུལ་པ་ཀུན་སྤངས་ཆོས་གྲགས་དཔལ།

རང་འདྲ་བུ་ཆེན་བཅུ་གསུམ་གྱི་རྣམ་ཐར་བསྡུས་པ་ཙམ་དུ་བརྗོད་པ་ནི། སྒྱུ་འཔྲུལ་དྲ་བའི་རྒྱུད་ལས། རེ་ཞིག་དང་པོར་དངོས་གྲུབ་ནི། །སློབ་དཔོན་རྗེས་སུ་འབྲང་ཡིན་པས། །སློབ་དཔོན་མེད་པར་གྱུར་ནས་ནི། །དངོས་གྲུབ་ཐོབ་པར་མི་འགྱུར་བས། །སློབ་དཔོན་མཚན་ཉིད་བཤད་པར་བྱ།། ཞེས་གསུངས་པ་ལྟར། གཉིས་པ་བྱང་ཆུབ་སེམས་དཔའ་ནམ་མཁའི་སྙིང་པོའི་སྤྲུལ་པ་ཀུན་སྤངསཆོས་གྲགས་དཔལ་བཟང་པོ་ཡིན། དེའི་འཁྲུངས་ཡུལ་ནི། ར་ལུང་དུ་ཡབ་བལ་པོ་རཏ྄ན་མཏི་ཞེས་བྱ་བ་གཙང་ཉང་སྟོད་དུ་ལྷ་བཟོར་བོས་ནས། སྲས་མོ་ཡེ་ཤེས་སྒྲོན་ཞེས་བྱ་བ་དང་བསྡེབ་པ་ལ། ནོར་ཕྱུགས་མང་ཀྱང་བུ་མེད་པས། ལོགས་སུ་བག་མ་ལེན་ཆས་བྱེད་པའི་ཚེ། ཡེ་ཤེས་སྒྲོན་སྡུག་བསྔལ་མི་བཟོད་པས་གཟིར་བ་རྒྱ་གར་པཎྜི་ཏ་ཞི་བ་བཟང་པོས་མཁྱེན་ནས།  དེ་ལ་ཐུགས་བརྩེ་བར་དགོངས་པའི་ཕྱིར་ཞི་བར་གཤེགས་ནས། ར་ལུང་དུ་དེའི་ལྷུམས་སུ་ཞུགས་ནས། ཆུ་མོ་ལུག་ལ་ངོ་མཚར་བའི་ལྟས་དུ་མ་དང་བཅས་པའི་སྐུ་བལྟམས་སོ།། དེའི་ཚེ་ཕ་མ་ཉེ་བ་དང་བཅས་པ་དགའ་ཚོར་སྐྱེས་ནས་བཙས་སྟོན་རྒྱ་ཆེན་པོ་བྱས་སོ།།

ཆོས་རྗེ་ཀུན་མཁྱེན་ཆེན་པོའི་མཛད་རྣམ།

༄༅།།   ཆོས་ཀྱི་རྗེ་ཀུན་མཁྱེན་ཆེན་པོ་ཡབ་སྲས་བཅོ་ལྔའི་རྣམ་ཐར་ཉེ་བར་བསྡུས་པ་ངོ་མཚར་རབ་གསལ།

༡༽ཀུན་མཁྱེན་རྟོན་པ་བཞི་ལྡན།

ན་མོ་གུ་རུ་ཀ་ཡ་རཏ་བྷཿ  ཆོས་རྗེ་དཔལ་ལྡན་བླ་མ་ཀུན་མཁྱེན་ཡབ་སྲས་ཀྱི་རྣམ་ཐར་ངོ་མཚར་རབ་གསལ་ཞེས་བྱ་བ། སྤྲུལ་སྐུ་ཆེན་པོ་ཆོས་རྗེ་མཚུངས་མེད་ཡབ་སྲས་རྣམས་ལ་ཕྱག་འཚལ་ཞིང་སྐྱབས་སུ་མཆིའོ།།  ཐུགས་བརྩེ་བ་ཆེན་པོས་དུས་ཀུན་རྗེས་སུ་བཟུང་དུ་གསོལ། 
རྒྱལ་བའི་རྣམ་འཕྲུལ་འཛམ་གླིང་རྒྱན་མཆོག་དཔལ། །
པདྨོའི་ཚལ་ལ་དམ་ཆོས་དགའ་སྟོན་འགྱེད། །
སྐལ་ལྡན་རྐང་དྲུག་ཚོགས་ཀུན་སྨིན་མཛད་པ། །
ཆོས་རྗེ་ཡབ་སྲས་བརྒྱུད་པའི་ཚོགས་ལ་འདུད། །
ཀུན་མཁྱེན་ཆོས་གྲགས་ལོ་ཙྪ་པཎྜི་ཏ། །
ཕྱོགས་རྒྱལ་འབྲི་གུང་ཞིང་སྟོན་ཉ་དབོན་པ། །
ཐང་སྟོན་སྨན་ཆུ་རིན་ཚུལ་གྷ་རུང་བ། །
ཕུན་ཚོགས་བློ་གྲོས་བསོད་ནམས་བཟང་ལ་འདུད། །
དད་ལྡན་རྐང་དྲུག་སྙན་པའི་གླུས་བསྐུལ་ནས། །
དམ་ཆོས་སྦྲང་རྩིའི་དགའ་སྟོན་སྐུ་དྲིན་ཅན། །
འདྲེན་མཆོག་ཆོས་རྗེ་ཡབ་སྲས་བཅོ་ལྔ་ཡི། །
རྣམ་ཐར་ངོ་མཚར་རབ་གསལ་ཅུང་ཟད་བྲི། །
འདིར་མཉམ་མེད་ཆོས་རྗེ་ཀུན་མཁྱེན་ཡབ་སྲས་ཁྱད་འཕགས་བཅོ་ལྔའི་རྣམ་ཐར་དཔག་མེད་ཡོད་པ་ལས། སོར་སྟེང་གི་རྡུལ་ཙམ་ཞིག་བརྗོད་པ་ནི།

ཤམ་བྷ་ལའི་ལམ་ཡིག་འཕགས་པ་དོན་ཡོད་ལྕགས་ཀྱུའི་གསུང་།

དཔལ་ལྡན་ཀ་ལཱ་པར་འཇུག་པ་ཞེས་བྱ་བ་ཡུལ་རྣམས་ཀྱི་མཆོག་ཏུ་གྱུར་བ་ཤམ་བྷ་ལར་འགྲོ་ཚུལ་གྱི་ལམ་ཡིག་འཕགས་པ་དོན་ཡོད་ལྕགས་ཀྱུའི་གསུང་།
རྒྱ་གར་སྐད་དུ། ཀ་ལཱ་པ་ཨ་ཝ་ཏ་ར། བོད་སྐད་དུ། ཀ་ལ་པར་འཇུག་པ། འཇིག་རྟེན་དབང་ཕྱུག་ལ་ཕྱག་འཚལ་ལོ།  འགྲོ་བའི་མགོན་པོ་ཐབས་དང་ལྡན། དེ་བཞིན་གཤེགས་ལ་རབ་བཏུད་ནས།   །གང་གི་དགའ་བའི་གནས་འཐོབ་འགྱུར། །ཐབས་ཏེ་འདིར་ནི་བཤད་པར་བྱ། །གཞོན་ནུ་ཟུར་ཕུད་ལྔ་པ་ནི། །ཐུགས་རྗེ་ལྡན་པ་འཇམ་པའི་དབྱངས། །རྒྱལ་སྲས་སྟོང་ཕྲག་བརྒྱད་དག་དང༌། །ལྷན་གཅིག་འདིར་ནི་རབ་གཤེགས་ནས། །དབང་ཆེན་ཞེས་བྱ་རི་བོ་ཆེན་པོ་ནི། །ཤར་དང་ནུབ་ཏུ་ཆུ་གཏེར་ཟབ་མོ་གནས། །གང་གི་ཕྱོགས་གཉིས་མེ་ཏོག་འབྲས་བུས་བརྒྱན། །རིག་འཛིན་རྣམས་ཀྱི་རོལ་པའི་གནས་དེར་བཞུགས། །

རྗེ་བཙུན་ཐམས་ཅད་མཁྱེན་པ་ཏཱ་ར་ནཱ་ཐ།

རྗེ་བཙུན་ཐམས་ཅད་མཁྱེན་པ་ཏཱ་ར་ནཱ་ཐ།
རྗེ་བཙུན་ཐམས་ཅད་མཁྱེན་པ་ཏཱ་ར་ནཱ་ཐའམ་ཀུན་དགའ་སྙིང་བོ་བཀྲ་ཤིས་རྒྱལ་མཚན་དཔལ་བཟང་པོ་མཆོག་ནི།   སྐྱེ་བ་མང་པོའི་སྔ་རོལ་ནས་ཕྱག་རྒྱ་ཆེན་པོའི་མཆོག་གི་དངོས་གྲུབ་བརྙེས་ཟིན་ན་ཡང༌།   སྐྱེ་བ་མེད་ལ་སྐྱེ་བའི་ཚུལ་དུ་སློབ་དཔོན་ཀླུ་སྒྲུབ་ཀྱི་སློབ་མ་འབར་བའི་གཙོ་བོ་ནས་རྒྱལ་བུ་དགའ་བྱེད་ས་སྐྱོང་གི་བར་སྐྱེ་བ་བཞེས་ཤིང་།   བོད་གངས་ཅན་གྱི་ལྗོངས་སུ་ཡང་ཀུན་མཁྱེན་ཀློང་ཆེན་པ།  འཇམ་དབྱངས་ཆོས་རྗེ།   རྗེ་ཀུན་དགའ་གྲོལ་མཆོག་སོགས་སྤྲུལ་བའི་བཀོད་པ་རིམ་དང་ཅིག་ཆར་དུ་བྱུང་བ་གྲངས་མེད་ན་ཡང༌།   འདིར་གང་དུ་འཁྲུངས་བའི་གནས་ནི་བོད་དབུས་གཙང་ལྷ་རྩེ་རྫོང་གི་ཆར་གཏོགས།   བསྟན་མ་བཅུ་གཉིས་ཀྱི་ནང་ཚན་ཁ་རག་ཁྱུང་བཙུན་མ་གནས་པའི་ཕྱོགས་འབྲང་ཕུ་ཞེས་པའི་ཡུལ།   གདུང་རུས་རྭ་ལོ་ཙྭ་བ་རྡོ་རྗེ་གྲགས་པ་ལས་གྱེས་པའི་རྭ་ཤར་ནུབ་གཉིས་ལས་ཤར་བ།   གྲུབ་ཐོབ་དབུས་སྨྱོན་པའི་ལུང་བསྟན་བཞིན།   ཡབ་རྣམ་རྒྱལ་ཕུན་ཚོགས་དང༌།   ཡུམ་རྡོ་རྗེ་བུ་དགའ་གཉིས་ཀྱི་སྲས་སུ་རབ་བྱུང་བཅུ་པའི་ཤིང་ཕག་ཕྱི་ལོ་ ༡༥༧༥ ལོར་ངོ་མཚར་བའི་ལྟས་དུ་མ་དང་བཅས་སྐུ་བལྟམས།   མཚན་སྲི་གཅོད་རྡོ་རྗེར་གསོལ།

གཞན་སྟོང་དབུ་མ་ཆེན་པོའི་བསྟན་རྒྱས་སྨོན་ལམ།

༄༅།། དཔལ་ལྡན་ཇོ་ནང་པའི་རིང་ལུགས་གཞན་སྟོང་དབུ་མ་ཆེན་པོའི་བསྟན་པ་རྒྱས་པའི་སྨོན་ལམ།   

ཨེ་མ་ཧོ། འཁོར་ལོ་ཐ་མ་སྙིང་པོ་བསྟན་པའི་མདོའི།།
དགོངས་པའི་གནད་གསང་འཕགས་བོད་མཁས་གྲུབ་བརྒྱས།།
ལུང་རིགས་མན་ངག་འཕྲུལ་གྱིས་ལེགས་དྲངས་པ།།
གཞན་སྟོང་དབུ་མའི་བསྟན་པ་རྒྱས་གྱུར་ཅིག།

གང་གཱའི་ཀླུང་རྡུལ་ལས་འདས་སངས་རྒྱས་ཀྱི།།
ཆོས་རྣམས་ཀུན་ལྡན་འོད་གསལ་འདུས་མ་བྱས།།
གཉིས་མེད་ཡེ་ཤེས་བདེ་གཤེགས་སྙིང་པོའི་དོན།།
གཞན་སྟོང་དབུ་མའི་བསྟན་པ་རྒྱས་གྱུར་ཅིག།

ཇོ་ནང་བསྟན་འབར་མ།

༄༅། །ཇོ་ནང་བསྟན་འབར་མ་ཞེས་བྱ་བ།

བསྐལ་བཟང་སྒྲོན་མེ་སྟོང་ཕྲག་ལས།།
ཐུགས་བསྐྱེད་པད་དཀར་ལྟར་འཕགས་པ།།
འགྲོ་མགོན་ཤཱཀྱའི་རྒྱལ་བོ་ཡི།།
བསྟན་པ་ཡུན་རིང་འབར་གྱུར་ཅིག།

ཐེག་གསུམ་མཐར་ཐུག་སེངྒེའི་སྒྲ།།
ངེས་དོན་འཁོར་ལོ་ཐ་མ་ཡི།།
སྡེ་སྣོད་དགོངས་འགྲེལ་བཅས་པ་ཀུན།།
ཡུན་རིང་བསྟན་པ་འབར་གྱུར་ཅིག།

ཀུན་མཁྱེན་ཇོ་ནང་པའི་བསྟན་པ་རྒྱས་པའི་སྨོན་ལམ།

༄༅། །རྒྱལ་བ་གཉིས་པ་ཀུན་མཁྱེན་ཇོ་ནང་པ་ཆེན་པོའི་བསྟན་པ་རྒྱས་པའི་སྨོན་ལམ།

རྒྱལ་བའི་རྒྱལ་ཚབ་རྒྱལ་བ་ཇོ་ནང་པ།།
ཆོས་ཀྱི་དབང་ཕྱུག་ཀུན་མཁྱེན་ཆོས་ཀྱི་རྗེ།།
བསྟན་པ་རིན་ཆེན་བསྟན་པའི་སྙིང་པོ་མཆོག།
ཕྱོགས་དུས་ཀུན་ཏུ་ཡུན་རིང་འབར་གྱུར་ཅིག།

བདེན་སྟོབས་བསླུ་མེད་དཀོན་མཆོག་རིན་ཆེན་གསུམ།།
རང་བཞིན་རྣམ་དག་ཆོས་དབྱིངས་འགྱུར་མེད་མཐུས།།
རྒྱལ་བ་གཉིས་པ་ཀུན་མཁྱེན་ཇོ་ནང་པའི།།
བསྟན་པ་ཕྱོགས་ཀུན་ཡུན་རིང་འབར་གྱུར་ཅིག།

ཇོ་ནང་བསྟན་པ་རྒྱས་པའི་སྨོན་ལམ།

ཕུན་ཚོགས་ཐར་པའི་ལམ་གྱི་གཞིར་གྱུར་པ། །
རྟག་ཆད་མཐའ་སྤངས་ཟབ་མོ་དབུ་མའི་ལམ། །
སྤྲོས་བྲལ་བདེ་གཤེགས་སྙིང་པོའི་དོན་སྟོན་པའི། །
ངེས་དོན་བསྟན་པ་ཕྱོགས་བཅུར་རྒྱས་པར་ཤོག །

ཀུན་མཁྱེན་ཆོས་ཀྱི་རྒྱལ་པོ་ཇོ་ནང་བའི། །
བསྟན་པ་ཡུལ་རྣམས་ཀུན་དུཏུ་ཁྱབ་པ་དང་། །
ཕྱོགས་རྣམས་ཀུན་ཏུ་ནམ་ཡང་མི་ནུབ་ཅིང་། །
དུས་རྣམས་ཀུན་ཏུ་འཕེལ་ཞིང་དར་བར་ཤོག །

ཇོ་ནང་བསྟན་རྒྱས་སྨོན་ལམ།

༄༅།།  ༧སྤྱི་ནོར་༧གོང་ས་༧སྐྱབས་མགོན་ཆེན་པོས་མཛད་པའི་ཇོ་ནང་བསྟན་པ་རྒྱས་པའི་སྨོན་ལམ་ཞེས་བྱ་བ་བཞུགས་སོ།།

༡༽ བགྲང་ཡས་བསྐལ་བར་ཐུགས་བསྐྱེད་ལེགས་གོམས་པས།། 
མཐའ་ཡས་འགྲོ་བའི་རེ་སྐོང་དམ་ཆོས་ཆར།། 
འབེབས་མཁས་མཉམ་མེད་ཤཱཀྱའི་དབང་པོ་ཡིས།། 
འགྲོ་འདི་དགེ་ལེགས་དཔལ་གྱིས་བསྐྱང་དུ་གསོལ།། 

༢༽ རིམ་གསུམ་ཆོས་ཀྱི་འཁོར་ལོའི་དགོངས་པའི་དོན།། 
མཁས་དང་གྲུབ་བརྙེས་དུ་མས་བཀྲལ་བ་ལས།། 
ཆོས་ཀྱི་སྒོ་མང་རབ་དབྱེའི་ཡ་གྱལ་གཅིག། 
ཇོ་ནང་པ་ཡི་བསྟན་པ་རྒྱས་གྱུར་ཅིག།

རྟག་བརྟན་གནས་བཤད།

༄༅།། རྟག་བརྟན་དམ་ཆོས་གླིང་ངེས་དོན་དགའ་བའི་ཚལ་གྱི་གནས་བཤད།

གླེང་གཞི།

          ཨོཾ་སྭ་སྟི། འདིར་དུས་གསུམ་དུ་བྱོན་པའི་རྒྱལ་བ་ཐམས་ཅད་ཀྱི་ཞིང་ཁམས་ཀྱི་མཆོག་འོག་མིན་སྟུག་པོ་བཀོད་པ་དང་གཉིས་སུ་མ་མཆིས་པ། སངས་རྒྱས་དང་བྱང་ཆུབ་སེམས་དཔའ་འཕགས་ཚོགས་རྒྱ་མཚོ་འདུ་བའི་གནས་ཆེན་འཛམ་གླིང་བྱེ་བ་ཕྲག་བརྒྱའི་ཆོས་གཞི་མཐའ་དག་གི་གཙུག་གི་ནོར་བུ། ཏིང་འཛིན་འབུམ་ཕྲག་བརྒྱའི་འབྱུང་གནས། ལེགས་བཤད་བྱེ་བ་སྒྲོག་པའི་སྐྱེད་ཚལ། འགྲོ་ཀུན་ཐར་བར་བསྒྲོད་པའི་ཐེམ་སྐས། སྲིད་ཞིའི་ཕན་བདེ་ཀུན་གྱི་རྩ་བ། མཆོག་དང་ཐུན་མོང་གྲུབ་པའི་ཞིང་ས། ཀུན་ཁྱབ་འཕྲིན་ལས་འབར་བའི་ཉིན་བྱེད། ཕྱོགས་བཅུ་དུས་གསུམ་རབ་འབྱམས་སྲིད་ཞི་མཐའ་དག་གི་རྣམ་དཀར་ལེགས་ཚོགས་ཐམས་ཅད་འབད་རྩོལ་མེད་པར་ལྷུན་གྲུབ་ངང་གིས་འདུ་བའི་གནས། རྟག་བརྟན་དམ་ཆོས་གླིང་ངེས་དོན་དགའ་བའི་ཚལ་གྱི་གཙུག་ལག་ཁང་འདིའི་ལོ་རྒྱུས་ཀྱི་དབང་དུ་བྱས་ན།

གནས་ཀྱི་ཆེ་བ་སྤྱིར་བཤད་པ།

དང་པོ།    གནས་ཀྱི་ཆེ་བ་སྤྱིར་བཤད་པ།

དེ་ལྟར་ན། སྒྲུབ་གནས་ཐམས་ཅད་ཀྱི་རྒྱལ་པོ། རི་ཁྲོད་ཆེན་པོ་དཔལ་ཇོ་མོ་ནང་གི་གནས་ཀྱི་སྒོ་ཆེན་པོར་གྱུར་བ་འདི་ཉིད་ལ་དང་པོར་ཕྱི་འབྱུང་བས་གྲུབ་པའི་དགེ་མཚན་གྱི་དབང་དུ་བྱས་ན།
བརྟན་ཅིང་བརྗིད་ལ་མཐོ་ཞིང་ལྷུན་ཆགས་པ། །
ལྷུན་པོ་བྱེ་བ་ཕྲག་བརྒྱའི་དཔལ་ཡོན་ཅན། །
ནགས་རྒྱལ་ཞེས་བྱ་རིའི་དབང་པོའི་འདབས། །
ས་སྲུང་བུ་ཡི་གདོང་གི་དབྱིབས་ཅན་ཡོད། །
རྒྱབ་རི་ནོར་བུའི་བྲག་ཚོགས་གཏམས་པ་ནི། །
ལྷ་མིན་གཡུལ་འཇོམས་ལྷ་ཚོགས་དབུགས་འབྱིན་མཛད། །
རྒྱལ་ཆེན་རྣམ་མང་ཐོས་པ་འགྱིང་པའི་སྐུ། །
སེང་གེའི་ཁྲི་ལ་བཞུགས་པའི་རྣམ་པ་ཅན། །
དེ་ཡི་མདུན་དུ་རིན་ཆེན་ཆར་འབབ་ཅིང༌། །
གཏེར་གྱི་བུམ་པ་འདྲ་བའི་རྟགས་མཚན་དང༌། །
མདུན་ནས་བལྟས་ན་གཡས་སུ་འཁྱིལ་བའི་དུང༌། །
རྒྱབ་བལྟས་བང་རིམ་དང་བཅས་མཆོད་རྟེན་དབྱིབས། །
རིན་ཆེན་རྡུལ་བརྩེགས་མཁའ་ལ་རྙོག་པ་འདྲ། །

གནས་མཆོག་དེར་གཙུག་ལག་ཁང་ཇི་ལྟར་བཞེངས་ཚུལ།

གཉིས་པ།    གནས་མཆོག་དེར་གཙུག་ལག་ཁང་ཇི་ལྟར་བཞེངས་པའི་ཚུལ།

          དེ་ཡང་སྟོན་པ་ཡང་དག་པར་རྫོགས་པའི་སངས་རྒྱས་ཀྱི་ཐུགས་རྗེའི་འོད་ཟེར་ལ་བརྟེན་ནས་འཛམ་གླིང་ཡངས་པའི་རྒྱལ་ཁམས་འདིར། སྐྱེས་བུ་དམ་པ་བསམ་གྱིས་མི་ཁྱབ་པ་བྱོན་མོད་ཀྱང༌། རྒྱ་བོད་ལ་སོགས་པ་འཛམ་གླིང་ལྷོ་ཕྱོགས་ཀྱི་དུམ་བུ་འདིར། ངེས་པའི་དོན་གྱི་གནད་མ་ལུས་ཤིང་ལུས་པ་མེད་པ་ཕྱིན་ཅི་མ་ལོག་ཅིང་མ་འཁྲུལ་པ་རྒྱ་ཆེར་གསུངས་བས༌། སྐལ་ལྡན་གྱི་སྐྱེ་བོ་གཞལ་དུ་མེད་པ་ཚིམ་པར་མཛད་པ་ནི། རྒྱལ་བ་ཉིད་ཀྱིས་རྔ་བོ་ཆེའི་མདོ་དང༌། ཨུ་དུམ་བ་རའི་མེ་ཏོག་ལྟར་དཀོན་པའི་མདོ་སྡེ་ལ་སོགས་པ། མདོ་སྡེ་དུ་མ་ཞིག་ནས་ལུང་བསྟན་པའི། ཀུན་མཁྱེན་ཆོས་ཀྱི་རྒྱལ་པོ་དུས་གསུམ་སངས་རྒྱས་དོལ་པོ་པ་ཤེས་རབ་རྒྱལ་མཚན་དཔལ་བཟང་པོ་ཞེས། ཕྱོགས་བཅུ་དུས་གསུམ་གྱི་རྒྱལ་པའི་ཞིང་ཁམས་ཐམས་ཅད་དུ་མཚན་སྙན་པའི་འབྲུག་སྒྲས་ཁྱབ་པ།  མཁས་གྲུབ་ཀྱི་བསྟན་འཛིན་གཟའ་སྐར་བྱེ་བ་ཕྲག་བརྒྱའི་དབུས་ན་མཁྱེན་བརྩེ་ནུས་པའི་ཡེ་ཤེས་ཡོན་ཏན་འཕྲིན་ལས་འོད་སྟོང་བདག་པོའི་ཚུལ་གྱིས། གཞན་ཐམས་ཅད་ཟིལ་གྱིས་མནན་དེ་བཞུགས་པ་དེ་ཡིན་པ་གདའ།

གཙུག་ལག་ཁང་རྟེན་གསུམ་དང་བཅས་པ།

གསུམ་པ།   གཙུག་ལག་ཁང་རྟེན་གསུམ་དང་བཅས་པ།

          གསུམ་པ་ནང་གི་གཙུག་ལག་ཁང་རྟེན་གསུམ་དང་བཅས་པ། ཇི་ལྟར་བཞུགས་པའི་དབང་དུ་བྱས་ན། ས་ཕྱོགས་འདི་ཉིད་རིའི་རྩ་བ་ནས་ཁྲི་སྟེགས་ཡན་ཆད། ཨེ་ཡིག་ཆོས་ཀྱི་འབྱུང་གནས་རྩེ་མོ་ཤར་དུ་བསྟན་པའི་རྣམ་པ་ཅན། དེའི་ནང་གི་ངོས་ཡངས་པའི་ཕྱོགས་སུ་སྤྱིར་གནས་གཞི་འདི་ཉིད་དང༌། ཁྱད་པར་གཙུག་ལག་ཁང་བཾ་ཡིག་བདེ་བ་ཆེན་པོའི་ཚུལ་དུ་བཞུགས་པ་ལགས། དེ་ལ་སྔོན་འོ་སྐོལ་གྱི་སྟོན་པའི་བཞུགས་གནས། རྒྱལ་བུ་རྒྱལ་བྱེད་ཀྱི་ཚལ་ལ་སོགས་པ་ཤིན་ཏུ་གཙོ་བོར་གྱུར་པ་ཐམས་ཅད་དང་མཐུན་པར། དབུས་སུ་གཙུག་ལག་ཁང་ཆེན་པོ། དེའི་མཐའ་ལ་གཙུག་ལག་ཁང་བཅུ་དྲུག གཞན་ཡང་ཇི་ལྟར་འོས་པར། གཙུག་ལག་ཁང་ཆེས་མང་བ་དང་བཅས་ཏེ་བཞུགས་པ་ཡིན་པ་ལས།

ངོ་མཚར་བའི་ལྷ་ཁང་བཅུ་དྲུག

བཞི་བ།   ངོ་མཚར་བའི་ལྷ་ཁང་བཅུ་དྲུག་རྟེན་བཅས།

          སྟེང་ཁང་བཀོད་པ་མཐའ་ཡས་ཞེས་བྱ་བ་འདི་ན། འོ་སྐོལ་གྱི་སྟོན་པ་ཡང་དག་པར་རྫོགས་པའི་སངས་རྒྱས་ཀྱི་རྣམ་ཐར་ཤིན་ཏུ་ངོ་མཚར་བ། མངོན་པར་འབྱུང་བའི་མདོ་དང༌། འདུལ་བ་ལུང་དང༌། ལས་བརྒྱ་པ་དང༌། རྟོགས་བརྗོད་བརྒྱ་པ་སོགས་ལས་བསྡུས་པའི་བཀོད་པ་བཞུགས། ཞེས་བརྗོད་ནས་ལོ་རྒྱུས་དང་བསྟུན་ཅི་རིགས་ཅི་རིགས་འདི་དང་འདིའོ་ཞེས་བཤད་དོ།།
          ལྷོ་ཕྱོགས་ངོས་ཀྱི་ལྷ་ཁང་འདི་ན། ལེགས་ལྡན་ཡེ་ཤེས་མགོན་པོ་ལྷ་ཆེན་དཔལ་འབར་གྱི་སྐུའི་བཀོད་པ་མི་འདྲ་བ་དུ་མ་དང༌། དཔལ་ལྷ་མོ་འདོད་པ་ཁམས་ཀྱི་དབང་ཕྱུག་མའི་སྐུའི་བཀོད་པ་མི་འདྲ་བ་དུ་མ་དང་བཅས་པ་ཤིན་ཏུ་བཀའ་གཉན་པར་བཞུགས།

ཞར་བྱུང་།

ཞར་བྱུང་།

          ཨོཾ་སྭ་སྟི། ཆོས་གྲྭ་བྱེ་བ་གྲངས་མེད་ཀྱི་དབུས་ན། རི་རབ་ལྟར་མངོན་པར་མཐོ་བ་རྟག་བརྟན་དམ་ཆོས་གླིང་འདི་ཉིད་ཀྱི་གནས་ཀྱི་རྩེ་མོར་གྱུར་པ་གཟིམས་ཁང་པོ་ཊ་ལ་འདི་ཉིད་ཀྱི་དབང་དུ་བྱས་ན། ལྷ་ཁང་ཕུག་མ་ན། འཕགས་པ་སྤྱན་རས་གཟིགས་དབང་ཕྱུག་ཁ་སར་པ་ཎི། གཡས་སུ་སྒྲོལ་མ་དང་ནོར་བཟང༌། གཡོན་དུ་ཁྲོ་གཉེར་ཅན་དང་རྟ་མགྲིན་ཏེ། འཕགས་པ་ལྷ་ལྔའི་འབུར་སྐུ་ཤིན་ཏུ་མཚར་བ་བྱིན་རླབས་དཔག་ཏུ་མེད་པ་དང་བཅས་པ་བཞུགས།

རྟག་བརྟན་དམ་ཆོས་གླིང་གི་གནས་བཤད།

ཇོ་ནང་གནས་བཤད།

མཆོད་བརྗོད་དང་གླེང་སློང་།
དང་པོ། ས་ལ་རང་བཞིན་གྱིས་གྲུབ་པའི་ཡོན་ཏན་གྱི་ཆེ་བ།
གཉིས་པ། སྐྱེས་བུ་དམ་པ་རྣམས་ཀྱིས་བྱིན་གྱིས་བརླབས་པའི་ཆེ་བ།
གསུམ་པ། སྒྲུབ་བརྒྱུད་ཆུ་བོའི་གཞུང་ལྟར་རྒྱུན་མ་ཆད་པའི་ཆེ་བ།
མཇུག་བྱང་དང་སྨོན་ཚིག

ཇོ་ནང་གི་གནས་བཤད།


༄༅།། ཇོ་ནང་གི་གནས་བཤད་བཞུགས།


མཆོད་བརྗོད་དང་གླེང་སློང་།


ཨོཾ་སྭ་སྟི།   །རྡོ་རྗེ་འཆང་དབང་དཔལ་ལྡན་དུས་འཁོར་དང༌།   །
ཟླ་བཟང་འཇམ་དཔལ་གྲགས་པ་པད་དཀར་སོགས།   །
ཆོས་རྒྱལ་རིག་ལྡན་སྤྲུལ་པའི་སྐུ་རྣམས་དང༌།   །
དུས་འཁོར་ཞབས་དང་ཟླ་བ་མགོན་པོ་དང༌།   །
རིགས་ལྡན་རྣམ་འཕྲུལ་ཆོས་རྗེ་ཡབ་སྲས་སོགས།   །
རྩ་བརྒྱུད་བླ་མ་རྣམས་ལ་གུས་པའི་འདུད།   །
བདག་ཅག་འདིར་ཚོགས་སྐལ་ལྡན་གདུལ་བྱ་ལ།   །
མཆོག་དང་ཐུན་མོངས་དངོས་གྲུབ་སྩ་དུ་གསོལ།   །

ས་ལ་རང་བཞིན་གྱིས་གྲུབ་པའི་ཡོན་ཏན་གྱི་ཆེ་བ།


དང་པོ།  ས་ལ་རང་བཞིན་གྱིས་གྲུབ་པའི་ཡོན་ཏན་གྱི་ཆེ་བ། 

དང་པོ་ས་ལ་རང་བཞིན་གྱིས་གྲུབ་པའི་ཡོན་ཏན་ནི།   གངས་ཅན་མནྡྷ་ར་དང་ལྷུན་པོ་སོགས།  །ལྷ་དང་དྲང་སྲོང་རིག་འཛིན་བགྲང་ཡས་ཀྱིས།   །ཉེ་བར་བསྟན་པའི་རི་ཡི་རྒྱལ་པོ་རྣམས།   །ཕྱོགས་འདིར་གཅིག་ཏུ་འདུས་པ་ལྟ་བུར་ཡོད།   །ཕུགས་བཞིའི་རི་རྣམས་རྩེ་མོ་ཤིན་ཏུ་མཐོ།   །རྩ་བ་བརྟན་ཅིང་དབྱིབས་ལེགས་ལྷུན་སྡུག་ཆགས།   །ངོས་རྣམས་སྨན་ལྗོངས་ཉམས་དགའ་ཡངས་པ་དང༌།   །ཟླ་བ་ཆུ་ཤེལ་ཨིན་དྲ་ནཱི་ལ་སོགས།   །ནོར་བུའི་ཕུང་པོ་བརྩེགས་འདྲའི་བྲག་རི་མཛེས།   །རི་བོའི་སུལ་རྣམས་ནགས་ཚལ་སྣ་ཚོགས་དང༌།   །ལྗོན་ཤིང་དུ་མས་རྣམ་པར་བརྒྱན་པ་ཡོད།   །ཟླ་བ་དྲུག་ཏུ་མེ་ཏོག་སྣ་ཚོགས་བཀྲ།   །

སྐྱེས་ཆེན་དམ་པའི་བྱིན་གྱིས་རླབས་པའི་ཆེ་བ།

གཉིས་པ།  སྐྱེས་བུ་དམ་པ་རྣམས་ཀྱིས་བྱིན་གྱིས་བརླབས་པའི་ཆེ་བ།
གཉིས་པ།  སྐྱེས་བུ་དམ་པ་རྣམས་ཀྱིས་བྱིན་གྱིས་བརླབས་པའི་ཆེ་བ་ནི།   གནས་འདི་དུས་གསུམ་གྱི་སངས་རྒྱས་རྣམས་ཀྱིས་བྱིན་གྱིས་བརླབས་ཤིང༌།   སྒོས་སུ་འཕགས་པ་སྤྱན་རས་གཟིགས་ཀྱི་ཞིང་མཆོག་ཏུ་གདོད་ནས་གྲུབ་པ་ཡིན་པ་ལས།   བསྟན་པ་འདི་ལ་མིའི་སྐྱེ་བ་ཉེ་བར་གཟུང་བའི་ཚུལ་བསྟན་པའི་དམ་པ་རྣམས་ཀྱིས་བྱིན་གྱིས་རློབས་ཚུལ་ནི།   སློབདཔོན་ཆེན་པོ་པདྨ་འབྱུང་གནས་ཞེས་བྱ་བ་སྤྲུཔའི་སྐུ་དེ་ཉིད་ཀྱིས།   བརྟན་མ་བཅུ་གཉིས་ཀྱི་གནས་རྣམས་སུ་བྱོན་ཞིང༌།   ཁྱད་པར་ནགས་རྒྱལ་གྱི་རི་ལ་ལན་མང་དུ་ཕེབས་པ་དང༌།   ཡང་དགོས་གནས་འདིར་ཞག་བདུན་བཞུགས་པར་གྲགས་ཤིང༌།   ཕུག་ཆེན་གོང་མ་དང་ཕུག་པ་གོང་འོག་རྣམས་སུ་ཕྱགས་ཕེབས། དེ་རྗེས་སུ་རིག་པ་འཛིན་པའི་སལ་བཞུགས་པ།   སྣུབས་ཆེན་ནམ་མཁའི་སྙིང་པོ་དང༌།   དམ་འབྲེ་ཀླུའི་རྒྱལ་མཚན་དང༌།   སྣ་ནམ་བ་ཚུལ་ཁྲིམས་འབྱུང་གནས་ལ་སོགས་པས་ཀྱང་སྒྲུབ་གནས་སུ་མཛད་ཅིང༌།

སྒྲུབ་བརྒྱུད་ཆུ་བོའི་གཞུང་ལྟར་རྒྱུན་མ་ཆད་པ།


གསུམ་པ།  སྒྲུབ་བརྒྱུད་ཆུ་བོའི་གཞུང་ལྟར་རྒྱུན་མ་ཆད་པའི་ཆེ་བ།

གསུམ་པ།   སྒྲུབ་བརྒྱུད་ཆུ་བོའི་གཞུང་ལྟར་རྒྱུན་མ་ཆད་ཅིང་དར་བའི་གཟི་བརྗིད་དཔལ་དང་ལྡན་པའི་ཡོན་ཏན་ནི།   ཁ་བ་ཅན་འདི་ན་སྔོན་སྒྲུབ་གནས་བསམ་གྱིས་མི་ཁྱབ་པ་བྱོན་ཞིང༌།   ད་ལྟར་ཡང་སྒྲུབ་གྲྭ་མང་དུ་ཡོད་མོད་ཀྱི། སྒྲུབ་གྲྭ་འདི་དང་པོར་ཚུགས་པ་དང་དུས་མཉམ་པའི་སྒྲུབ་གྲྭ་བཤད་གྲྭ་རྣམས་སྨོས་ཀྱང་ཅི་དགོས།    འདི་དག་ལས་ཆེས་འཕྱི་བ་དུས་ཕྱིས་བཏབ་པ་རྣམས་ཀྱང༌།   འགའ་ཞིག་ནི་རྩ་བ་ནས་སྟོངས།   འགའ་ཞིག་ནི་གྲོང་ཡུལ་དང་སེར་ཁྱིམ་དུ་སོང༌།   ཁ་ཅིག་སྔོན་གྱི་ཤུལ་དུ་ད་ལྟ་སྒྲུབ་གྲྭ་ཡོད་པ་འང་འདུག་མོད་ཀྱི།   བར་སྐབས་སུ་སྟོངས་པའི་ཤུལ་ལ་གསར་འདེབས་བྱས་པ་དང༌།   ཁ་ཅིག་སེར་ཁྱིམ་གྱི་ས་ནས་གཙང་མའི་གྲྭ་གསར་དུ་ཕྱེ་བ་དང༌།   བར་སྐབས་སུ་སེར་ཁྱིམ་དུ་སོང་བ་རྣམས་ཕུད་ནས།   དེའི་ཤུལ་དུ་གྲྭ་ཚང་ངམ་སྒྲུབ་གྲྭ་གསར་འཛུག་བྱས་པ་ཁོ་ན་ཡིན་གྱི།   ལོ་སུམ་བརྒྱ་བཞི་བརྒྱ་ཙམ་དུ་གང་སྟོངས་དང་སེར་ཁྱིམ་ལ་སོགས་པས་བར་མ་ཆོད་པར།   བླ་བརྒྱུད་ཆོས་བརྒྱུད་གཅིག་ཅིང༌།   ཉམས་ལེན་གྱི་རྒྱུན་གཅིག་པའི་སྒྲུབ་བརྒྱུད་བར་མ་ཆད་པར་དར་བ་ནི།  བོད་གངས་རིའི་ཁྲོད་ན་སྒྲུབ་གནས་དམ་པ་འདི་ཁོ་ན་ལས་གཞན་མེད།