ཇོ་ནང་གི་གནས་བཤད།


༄༅།། ཇོ་ནང་གི་གནས་བཤད་བཞུགས།


མཆོད་བརྗོད་དང་གླེང་སློང་།


ཨོཾ་སྭ་སྟི།   །རྡོ་རྗེ་འཆང་དབང་དཔལ་ལྡན་དུས་འཁོར་དང༌།   །
ཟླ་བཟང་འཇམ་དཔལ་གྲགས་པ་པད་དཀར་སོགས།   །
ཆོས་རྒྱལ་རིག་ལྡན་སྤྲུལ་པའི་སྐུ་རྣམས་དང༌།   །
དུས་འཁོར་ཞབས་དང་ཟླ་བ་མགོན་པོ་དང༌།   །
རིགས་ལྡན་རྣམ་འཕྲུལ་ཆོས་རྗེ་ཡབ་སྲས་སོགས།   །
རྩ་བརྒྱུད་བླ་མ་རྣམས་ལ་གུས་པའི་འདུད།   །
བདག་ཅག་འདིར་ཚོགས་སྐལ་ལྡན་གདུལ་བྱ་ལ།   །
མཆོག་དང་ཐུན་མོངས་དངོས་གྲུབ་སྩ་དུ་གསོལ།   །

འདིར་ཞིང་ཁམས་མཆོག་ཏུ་གྱུར་པ་མི་མཇེད་འཇིག་རྟེན་གྱི་ཁམས།   གླིང་ཁྱད་པར་ཅན་བདུན་པ་ལས་ཀྱི་ས།   དུམ་བུ་བླ་ན་མེད་པ་འཛམ་གླིང་ལྷོའི་ཕྱོགས།  རྒྱལ་ཁམས་ངོ་མཚར་ཅན་བུ་རྒྱལ་བོད་ཀྱི་ཡུལ།   དུས་གསུམ་རྒྱལ་བ་ཀུན་གྱི་ཞིང་ཁམས།   རྒྱལ་སྲས་བྱང་སེམས་ཀུན་གྱི་མཛད་པའི་སྤྱོད་ཡུལ།   གསང་སྔགས་འཛིན་པ་ཀུན་གྱི་གནས་མཆོག་དམ་པ།   གངས་ཅན་ལྗོངས་འདིའི་ལྟེ་བ་སའི་ཐིག་ལེ།རི་བོ་སྟོང་ཕྲག་དུ་མའི་དབུས་ན་མངོན་པར་འཕགས་པ།   ས་འཛིན་དབང་པོ་ནགས་རྒྱལ་དཔལ་གྱི་རི།   རུ་ལག་གཡས་རུའི་སོ་མཚམས།   ཕྱི་ལྟར་ན་སངས་རྒྱས་ཀུན་གྱི་ཟབ་མོའི་ཆོས་སྒྲ་སྒྲོགས་པའི་གནས་བྱ་རྒོད་ཕུང་པོའི་རི།   ནང་ལྟར་ན་འཕགས་པ་སྤྱན་རས་གཟིགས་ཀྱི་ཕོ་བྲང་དམ་པ་རི་བོ་པོ་ཊ་ལ།   གསང་བ་ལྟར་ན་རྡོ་རྗེ་ཐེག་པའི་ངེས་གསང་འབྱུང་ཞིང་དར་བའི་གནས་བྱང་ཕྱོགས་ཤམ་བྷ་ལ།   དེ་ཁོ་མ་ཉིད་ལྟར་ན་དཔལ་ལྡན་འབྲས་སྤུང་ཆོས་ཀྱི་དབྱིངས་གསུང་གི་དབང་ཕྱུག་གི་དཀྱིལ་འཁོར་དོན་དམ་ཡེ་ཤེས་སངས་རྒྱས་སེང་གེའི་ཁྲིར་བཞུགས་ཨེ་ཝཾ་ཟུང་འཇུག་གི་ངོ་བོ།   སྒྲུབ་གནས་བྱེ་བ་ཕྲག་བརྒྱའི་དབུས་ན།   ལྷུན་པོ་ལྟར་མངོན་པར་མཐོ་བའི་ཞིང༌།   གྲགས་པ་ཉི་ཟླ་ལྟར་གསལ་བ།   རི་ཁྲོད་ཆེན་པོ་ཇོ་ནང་ཞེས་ཡོངས་སུ་གྲགས་པ་འདིའི་གནས་ཀྱི་ཆེ་བའི་དབང་དུ་བྱས་ན།  
ས་གཞི་ལ་རང་བཞིན་གྱིས་གྲུབ་པའི་ཡོན་ཏན་དང༌།   སྐྱེས་བུ་དམ་པ་རྣམས་ཀྱིས་བྱིན་གྱིས་བརླབས་པའི་ཆེ་བ་དང༌།   སྒྲུབ་བརྒྱུད་ཆུ་བོའི་གཞུང་ལྟར་རྒྱུན་མཆད་ཅིང་དར་བའི་གཟི་བརྗིད་དཔལ་དང་ལྡན་པའོ།།
དང་པོ།  རང་བཞིན་གྱིས་གྲུབ་པའི་ཡོན་ཏན་གྱི་ཆེ་བ།

No comments:

Post a Comment