ཤམ་བྷ་ལའི་ལམ་ཡིག་འཕགས་པ་དོན་ཡོད་ལྕགས་ཀྱུའི་གསུང་།

དཔལ་ལྡན་ཀ་ལཱ་པར་འཇུག་པ་ཞེས་བྱ་བ་ཡུལ་རྣམས་ཀྱི་མཆོག་ཏུ་གྱུར་བ་ཤམ་བྷ་ལར་འགྲོ་ཚུལ་གྱི་ལམ་ཡིག་འཕགས་པ་དོན་ཡོད་ལྕགས་ཀྱུའི་གསུང་།

རྒྱ་གར་སྐད་དུ། ཀ་ལཱ་པ་ཨ་ཝ་ཏ་ར། བོད་སྐད་དུ། ཀ་ལ་པར་འཇུག་པ། འཇིག་རྟེན་དབང་ཕྱུག་ལ་ཕྱག་འཚལ་ལོ།  འགྲོ་བའི་མགོན་པོ་ཐབས་དང་ལྡན། དེ་བཞིན་གཤེགས་ལ་རབ་བཏུད་ནས།   །གང་གི་དགའ་བའི་གནས་འཐོབ་འགྱུར། །ཐབས་ཏེ་འདིར་ནི་བཤད་པར་བྱ། །གཞོན་ནུ་ཟུར་ཕུད་ལྔ་པ་ནི། །ཐུགས་རྗེ་ལྡན་པ་འཇམ་པའི་དབྱངས། །རྒྱལ་སྲས་སྟོང་ཕྲག་བརྒྱད་དག་དང༌། །ལྷན་གཅིག་འདིར་ནི་རབ་གཤེགས་ནས། །དབང་ཆེན་ཞེས་བྱ་རི་བོ་ཆེན་པོ་ནི། །ཤར་དང་ནུབ་ཏུ་ཆུ་གཏེར་ཟབ་མོ་གནས། །གང་གི་ཕྱོགས་གཉིས་མེ་ཏོག་འབྲས་བུས་བརྒྱན། །རིག་འཛིན་རྣམས་ཀྱི་རོལ་པའི་གནས་དེར་བཞུགས། །

ཤེས་བྱ་ཀུན་ལ་མ་ཐོགས་པའི། །སྤྱན་དང་ལྡན་པ་འཇིག་རྟེན་དབང༌། །རྒྱལ་སྲས་བྱེ་བའི་ཚོགས་བཅས་ལ། །གནས་སྐབས་དེ་ནི་དེ་གཤེགས་ནས། །ལྷ་དང་ལྷ་མིན་འབྱུང་པོའི་དབང༌། །ལྟོ་འཕྱེའི་བདག་དང་ཀླུ་ཡི་གཙོ།། སྐལ་བཟང་མཐུ་དང་ལྡན་པ་ཡི། །མི་དང་མི་རྣམས་དེར་འདུས་ལ། །གང་གི་བླ་ན་མེད་པ་མཆོག། །གཟི་བརྗིད་ཆེན་པོའི་ཐེག་མཆོག་སྟེ། །བྱེ་བ་ཕྲག་བརྒྱའི་ཆོས་ཀྱི་གཏམས། །ཡང་དག་བསྒྲོག་ནས་རབ་ཏུ་བསྟན། །བྷ་ཏའི་དུམ་བུ་འཛམ་གླིང་སྐྱེས། །ཀོ་ས་ལ་དང་ཡངས་པ་ཅན། །ལུས་འཕགས་མཻ་ཐི་ལ་དག་ན། །སྐལ་བཟང་གཅིག་ཅིག་དེ་དག་ཡོང༌།། བློ་གྲོས་ཆེ་ལྡན་ལྔ་བརྒྱའི་ནི། །དེ་འདྲེའི་གཏམ་ནི་ཡང་ཡང་ཐོས། །གཞན་ལ་ཕན་བྱེད་རིག་པའི་བློ། །རྨད་བྱུང་མང་པོ་སྐྱེས་པར་གྱུར། །དཀའ་བ་བརྒྱ་ཕྲག་འབད་པ་ཡིས། །དབང་ཆེན་གྱི་ནི་རི་ལ་སོང༌། །གཞོན་ནུར་གྱུར་པ་མི་སྣང་ནས། །ཕྱག་ན་པདྨའི་ཞབས་ལ་བཏུད། །ཡང་དག་མཆོད་ནས་རབ་དྲིས་པ། །ཚངས་ལ་སོགས་པ་ལྷས་བརྒྱད་ཅིང༌། །འགྲོ་བ་དྲུག་ལ་མཉམ་པར་བརྩེ། །ཐོས་ནས་བདག་ཅག་འདིར་འོང་ལགས། །གང་གི་ཞབས་བཀྲུའི་ཆུ་འཐུངས་པས། །བདེ་མེད་བདེ་བ་ལྡན་གྱུར་ཅིང༌། །འདོད་པ་དང་ནི་ཐར་བ་འགྲུབ། །ལྷ་ཡིའང་ལྷ་ཁྱོད་ཕྱག་འཚལ་ལོ། །གང་ཟག་དང་ནི་ཆོས་ལ་སོགས།། འགལ་ཡང་མ་གཟིགས་དམིགས་སུ་མེད། །འོན་ཀྱང་མི་ཟད་ཐུགས་རྗེ་ཡིས། །ཀུན་ལ་སྐྱོབ་མཛད་འདི་རེ་མཚར། །འདིར་འོང་འདི་དག་ལ་བརྩེ་བས། །དོན་ཆེན་འགའ་ཞིག་ཞུ་འཚལ་ནི། །ཕྱི་མའི་དུས་འགར་ཕན་པའི་སླད། །ཡང་དག་གསུངས་བས་བཤད་དུ་གསོལ། །མ་འོངས་པ་ཡི་དུས་ན་ནི། །རིག་སྔགས་སྨྲ་བ་ཁས་འཆེ་ཞིང༌། །རྒྱལ་བའི་དགོངས་པ་མི་ཤེས་པ། །དེ་དག་ཕྱིན་ཅི་ལོག་ཏུ་བལྟ། །གང་ཕྱིར་འདི་དག་ཡོངས་དག་པའི༑ ༑ལམ་དུ་ངེས་པར་འཇུག་འགྱུར་པ། །ཇི་ལྟར་ཕྱུགས་ལ་དབྱུག་པ་ལྟའི། །ཐབས་དེ་གང་ལ་རྙེད་པར་འགྱུར། །དེ་ནས་བཅོམ་ལྡན་སྙིང་རྗེ་ཆེ། །སྤྱན་རས་གཟིགས་ཀྱི་འདི་སྐད་གསུངས། །འགྲོ་རྣམས་མང་ལ་ཕན་འདོད་པས། །འདྲི་བ་འདི་ནི་ལེགས་སོ་ལེགས།། དབང་ཆེན་རི་ལ་མཆོད་འོས་པའི། །གཞོན་ནུར་གྱུར་པ་སྔོན་བཤད་དེ། །དོན་འདི་ཡང་ནི་ལེགས་པར་བསྟན། །མཉམ་མེད་སེམས་ཅན་དོན་བྱེད་པའོ། །སྐྱེ་བོ་འདི་ལ་ཕན་བྱེད་ཕྱིར། །སྔགས་འཛིན་རལ་བ་གཅིག་མ་ལོངས། །སྙིང་རྗེ་ལྡན་པ་དོན་ཡོད་པའི། །ལྕགས་ཀྱུ་ཁྱོད་ནི་མཐུ་ཆེན་ལྡན། །ཁྱོད་བདག་ཕན་ཚུན་བསྒྲོས་པ་ཡི། །དོན་ཆེན་འདི་ནི་སྨྲ་བར་གྱིས། །སྟོབས་བཅུ་ལྡན་པའི་བསྟན་པ་ལ། །ཕྱི་མའི་དུས་ན་དོན་ཆེན་འགྱུར།། འཇམ་དཔལ་རྗེས་སུ་འཇུག་པས་ནི། །ཁྱོད་ཀྱང་སྨྲ་བའི་མཐུ་དང་ལྡན། །དེ་སྐད་གསུངས་ནས་འཇིགས་རྟེན་མགོན། །སྟོང་པ་ཉིད་ཀྱི་གནས་ལ་བཞུགས། །དེ་ནས་ཡང་དེའི་ཚེ་འཕགས་པའི་གཙོ་བོ་དོན་ཡོད་ལྕགས་ཀྱུས་གསུངས་པ། ཕྱི་མའི་དུས་ན་སྣ་ཚོགས་པའི། །བློ་གྲོས་ངན་པ་བསྐྱེད་པས་ན། །ལྷ་མོ་སྒྱུ་འཕྲུལ་སྲས་ཀྱིས་བསྟན། །ཤིན་ཏུ་ནག་པོའི་དྲི་མར་བྱས། །བརྗོད་པ་སྣ་ཚོགས་ཐ་དད་དེ། །སྐྱེ་བོ་ཐ་དད་སྤྱོད་ལ་བསྔགས། །དེ་ཕྱིར་དེ་ལྟར་སྤྱོད་རྣམས་ལ། །དབང་པོ་མེད་པར་རྣམས་པར་འཁྲུགས། །འཇིག་རྟེན་འདས་པའི་དངོས་གྲུབ་ཀུན། །ནམ་ཡང་ཐོས་པ་མེད་དེ་ནི། །གཞན་ཡང་དཀའ་བས་འགྲུབ་པ་དང༌། །ངལ་བ་འབའ་ཞིག་བསྐྱེད་པར་བྱེད། །ཤིན་ཏུ་སྒྲིབ་བྱེད་ཀྱིས་བསྒྲིབས་པས། །ཡི་དྭག་སོགས་ཀྱང་ལྐོག་གྱུར་ན། །ལྷ་རྣམས་སྨོས་ཀྱང་ཅི་དགོས་ཏེ། །རྟོག་གེ་ཕྲན་ཚེག་འཇུག་ཤེས་ཉིད། །དེ་ཙམ་གྱིས་ཀྱང་གྲུབ་པར་བལྟ། །འཕགས་པའི་སྐྱེ་བོ་ཡིད་ཀྱི་ལུས། །མཐོང་བའི་སྤྱོད་ཡུལ་ནམ་ཡང་ཅི། །དོན་མཆོག་འདོད་པའང་སྙེད་མི་འགྱུར །འདི་ནས་བྱང་གི་ཕྱོགས་ཆ་ན། །ཀེ་ལ་ཤ་ཡི་རི་བོའི་ངོགས། །གྲོང་ཁྱེར་ཀ་ལ་པ་ཞེས་ཡོད། །རྟག་ཏུ་བདེ་ཞིང་འབྱོར་བ་ཡིན། །དེ་ན་རྒྱལ་བའི་སྲས་པོ་མང༌། །མི་བདག་གཙོ་བོ་མཆོག་འཕགས་ཏེ། །དེ་ན་རྟག་ཏུ་ཆོས་དང་ལྡན། །གཡོ་རྒྱུ་མེད་ཅིང་ཕྲ་མ་མེད། །རིགས་དང་རིགས་མིན་དབྱེར་མེད་དེ། །གཟུགས་ལྡན་སྟོབས་དང་ལྡན་པ་ཡིན། །སྐྱེས་བུའི་བགྲོད་པ་དཔག་ཚད་བཅུ། །རྟ་ཡི་ཉི་ཤུ་པོ་ལྡན་གྱི། །ལྔ་བཅུའི་ལམ་དེ་ཉིན་གཅིག་ལའོ། །ཡམས་དང་ཉེར་འཚེ་ཡོངས་མེད་དེ། །འཕྲོག་བྱེད་ལག་ན་རྡོ་རྗེ་སོགས། །ཉིན་རེ་རྟག་ཏུ་བསྲུང་བར་བྱེད། །རྣམ་པར་འདྲེན་པའི་བསྟན་བཅོས་ནི། །ཕྱོགས་དེ་དག་ཏུ་རྣམ་པར་རྒྱལ། །ཤེས་རབ་ཕ་རོལ་ཕྱིན་མདོ་དང༌། །མདོ་སྡེའི་ལང་ཀའི་གྲོང་དུ་འཇུག །དགོངས་པ་ངེས་པར་སྟོན་པ་དང༌། །འདུས་པ་ཆེན་པོའི་ཚོགས་ཀྱི་སྡེ། །སྒྲིབ་པ་རྣམ་པར་སེལ་བ་ཡིས། །མངོན་དུ་བྱེད་པའི་དཀོན་མཆོག་སྤྲིན། །བདེན་པའི་ལེའུ་མཆོག་གི་རྒྱུད། །དྲག་ཤུལ་སྟོབས་དང་ལྡན་པ་ནི། །སོར་མོའི་འཕྲེངབའི་ཆེད་གསུངས་དང༌། །སྡོང་པོ་བརྒྱན་པ་ལ་སོགསཔ། །ཐམས་ཅད་ཡུལ་དེ་ལས་རབ་འབྱུང༌། །འོད་དཔག་མེད་པའི་འཇིག་རྟེན་དང༌། །མངོན་དགའི་བཀོད་པ་གསལ་བ་དང༌། །རྣམ་སྣང་མཛད་པའི་ཞིང་ཁམས་ནི། །བརྒྱན་གྱི་བཀོད་པར་བཅས་པ་དང༌། །སྟུག་པོ་བཀོད་པའི་མདོ་སྡེ་དང༌། །དབང་ཕྱུག་ཆེན་པོའི་བཤད་པ་ནི། །གནས་གཙང་ཆེན་པོ་ལ་སོགས་པར། །རྡོ་རྗེ་སྙིང་པོའི་བཤད་དེ་ནི། །ཕལ་པོ་ཆེ་ཡི་མདོ་སྡེ་རྣམས། །ཐམས་ཅད་དེ་ན་རྣམ་པར་དཔྱོད། །གང་ལ་དཔེ་ནི་འབུམ་ཕྲག་གིས། །གསལ་བར་བྱས་པ་ཕྱི་མའིརྒྱུད། །དེ་བཞིན་གཤེགས་རྣམས་སྙིང་པོའི་དོན། །ཕྱིར་མི་ལྡོག་པའི་གཏམ་ཡང་ཡིན། །ཕ་རོལ་ཕྱིན་པ་དྲུག་གི་མདོ། །སྟོང་ཕྲག་ལྔ་བཅུར་ལྡན་པ་ཡོད། །རིག་པ་འཛིན་པའི་སྡེ་སྣོད་ནི། །འབུམ་ཕྲག་ཉི་ཤུ་དེར་སྤྱོད་དེ། །དེ་དག་རྗེས་སུ་འཇུག་པ་ཡིན། །ངེས་པར་བསྟན་པ་འབུམ་ཕྲག་བརྒྱ། །མཁའ་དང་མཉམ་པ་རྒྱུད་ཀྱི་རྒྱལ། །དངོས་གྲུབ་ངེས་པར་བསྟན་པ་ཡི། །དགྱེས་པའི་རྡོ་རྗེ་ཆེན་པོ་དང༌། །རྗེས་སུ་རིག་པ་རྣལ་འབྱོར་རྒྱུད། །བདེ་གཤེགས་ཀུན་གྱི་འདུས་པ་ནི། །སྟོང་ཕྲག་ཉི་ཤུ་རྩ་ལྔ་བ། །དམ་པ་དང་པོའི་སངས་རྒྱས་རྒྱུད། །སྒྱུ་འཕྲུལ་དྲྭ་བ་ཉེར་གཉིས་པ། །རྒྱལ་བ་རྒྱ་མཚོ་རྣམ་དབྱེ་བ། །རྣལ་འབྱོར་རྣལ་འབྱོར་མ་རྒྱུད་ཀྱི། །རྣམ་པར་ཕྱེ་བ་བརྒྱད་པོ་རྣམས། །ཁྲི་ཕྲག་གཉིས་དང་སྟོང་ཕྲག་ནི། །གཅིག་སྟོང་དྲུག་བརྒྱའི་ལྷག་པའི་ལམ། །ལྷག་པའི་རྒྱ་ཕྲག་མང་པོར་ནི། །ཕྱོགས་དེར་མངོན་གསུམ་སྤྱོད་པའོ། །ཕྱག་ན་རིན་ཆེན་བློ་ཡི་བདག །སྤོས་ཀྱི་གླང་པོ་མ་ཕམ་པ། །བདེ་ལྡན་དབང་ཕྱུག་ནམ་མཁའ་མཛོད། །རྡོ་རྗེ་གཟི་བརྗིད་རྡོ་རྗེ་སྙིང༌། །གནོད་སྦྱིན་གཙོ་བོ་ལ་སོགས་པས། །དེ་རྣམས་རྗེས་སུ་འཇུག་པ་ཡིས། །ཚིག་རྣམས་དུ་མ་རྣམ་པར་ཕྱེ། །ནན་ཏན་ཆེན་པོའི་གཏད་པས་ན། །མ་ལོག་དོན་ཆེན་འཚོལ་བ་རྣམས། །གངས་རིའི་དབང་པོ་དེར་སོང་ནས། །མི་བདག་གྲུབ་པ་རྣམས་ལ་དྲིས། །གདོན་མི་ཟ་བར་དོན་འགྲུབ་ཉིད། །

          དེ་ནས་འཕགས་མ་རྡོ་རྗེ་སྲིན་མོ་རལ་གཅིག་མས་ཞུས་པ། ཀྱཻ་རྒྱལ་བའི་སྲས་པོ་མ་འོངས་པའི་དུས་ལྔ་བརྒྱ་ཐ་མ་ལ། དེ་བཞིན་གཤེགས་པའི་རྗེས་སུ་འཇུག་པ་རྣམས་ཀྱང། མུ་སྟེགས་ཅན་གྱི་གསང་ཚིག་འཚོལ་བ་ལ་མངོན་པར་མོས་པས་མཆོག་ཏུ་གསང་བའི་དོན་ལས་ཕྱིར་ཕྱོགས་པ་དེ་དག་ཡང་དག་པའི་ལམ་ལ་གཟུང་པ་དང༌། མཆོག་གི་སྐལ་བ་གང་དག་རང་དང་གཞན་ལ་ཕན་པའི་དངོས་གྲུབ་ཀྱི་རྒྱུར་གྲོང་ཁྱེར་ཀ་ལཱ་པར་འགྲོ་བའི་ཐབས་དེ་ཡང་དག་པར་བསྟན་ཏུ་གསོལ། དགེ་བསྙེན་རྣམ་པར་མི་རྟོག་པ་ཞེས་བྱ་བ་དང༌། བཟང་པོ་སྦས་པ་ཞེས་བྱ་བ་ལ་སོགས་པ་ལྔ་བརྒྱ་པོ་འདི་རྣམས་ཀྱི་དངོས་གྲུབ་མཆོག་གི་དོན་དང༌། ཕྱི་མའི་དུས་ཀྱི་རིག་པ་འཛིན་པའི་སྡེ་སྣོད་ལ་ཞུགས་པ་མང་པོ་དག་གི་བདེ་བར་འགྱུར་བ་དང༌། ཕན་པར་འགྱུར་བ་དང༌། གྲུབ་པ་མཆོག་ཏུ་གྲུབ་པ་བླ་ན་མ་མཆིས་པའི་སླད་དུ་བཤད་པར་གསོལ། རབ་ཏུ་བཤད་པར་གསོལ། ལེགས་པར་བཤད་དུ་གསོལ། དོན་ཡོད་ལྕགས་ཀྱུས་གསུངས་པ། སྔགས་རིག་རྣམས་ལ་ཕན་པའི་ཕྱིར། །ཁྱེད་རྣམས་ལེགས་པར་མཉན་པ་དང༌། །ལྔ་བརྒྱའི་ཚོགས་རྣམས་ང་ལ་ཉོན། །ཕྱི་དུས་དོན་ཆེན་འདིར་འབྱུང་ངོ༌།།

          འདིར་སྒྲུབ་པ་པོ་གང་ཟག་གི་ལེགས་པའི་ལམ་ལ་གནས་པ་བླ་ན་མེད་པའི་བྱང་ཆུབ་ཏུ་སེམས་བསྐྱེད་ཅིང༌། དཀྱིལ་འཁོར་དུ་དབང་བསྐུར་བ། རིག་པའི་ཆོ་ག་ཤེས་ཤིང༌། དམ་ཚིག་ལ་ཡང་དག་པར་གནས་པ། དེ་བཞིན་གཤེགས་པས་བསྟན་པའི་རྒྱུད་ལ་མངོན་དུ་ཕྱོགས་པ་གསལ་བ། ཡིད་གཞུངས་པ། ཤེས་པ་དང་ལྡན་པ་དེས། དང་པོར་འདོད་པའི་ལྷ་མཉེས་པར་བྱའོ།། དེའི་འོག་ཏུ་གྱུར་བ་འམ། རྨི་ལམ་དུ་མཐོང་བ་ཡིན་ཀྱང་རུང་སྟེ། འདོད་པའི་ལྷ་ལས་ནམ་དུ་གནང་བ་ཐོབ་པར་གྱུར་ན། ཀེ་ལ་ཤར་འཇུག་པའི་ཐབས་ལ་བརྩོན་པར་བྱ་ཡི་གཞན་དུ་ན་ཀུན་ནས་ཉོན་མོངས་པར་འགྱུར་རོ།། རབ་ཏུ་མི་གསལ་བསམ་གཏན་དང༌། །བཟླས་བརྗོད་སྟོབས་ཀྱིས་དམན་པ་དང༌། །མཚན་མའི་དགེ་བས་བོར་བ་གང༌། །འདོད་པའི་གོ་འཕང་གྲུབ་པ་མེད། །ངན་པའི་ལམ་གྱི་ཁེངས་པ་དག །ཆོ་ག་ཙམ་གྱི་འགྲུབ་པར་ལྟ། །བྱིས་རྨོང་འཇིམ་པའི་གོང་བུ་ལ། །འཛེགས་ན་ཟླ་བ་འཛིན་པར་འདོད། །ཅི་སྟེ་གནང་བར་གྱུར་ན་འཕགས་པ་འཇམ་དཔལ་གྱི་སྙིང་པོ་འབུམ་ཕྲག་བརྒྱད་བཟླས་ཤིང༌། ཨུ་དུམ་ཝ་རའི་སྦྱིན་བསྲེག་ཀྱང་ཁྲི་ཕྲག་བརྒྱད་བྱའོ།། བགེགས་རྣམས་འཇོམ་པའི་དོན་དུ་བདུད་རྩི་འཁྱིལ་པའི་རིག་པ་འབུམ་ཕྲག་བཟླ་ཞིང༌། སྦྱིན་བསྲེག་ཀྱང་ཁྲི་ཕྲག་གཅིག་གོ། སྡང་བ་ཐམས་ཅད་རབ་ཏུ་འཇིགས་པའི་དོན་དུ་ཁྲོ་བོ་ཆེན་པོ་རབ་ཏུ་མི་བཟད་པ་གཤིན་རྗེ་མཐར་བྱེད་ཀྱི་རིག་པ་འབུམ་དུ་བཟླ་ཞིང༌། དེ་ནས་ཐོག་མ་ཉིད་དུ་ཀེང་ཤུ་ཀའི་སྦྱིན་སྲེག་སྟོང་ཕྲག་གཅིག་འབུལ་ལོ།། དེའི་འོག་ཏུ་བཱ་ཊའི་ཤིང་གི་སྟོང་ཕྲག་བཅུ་པའོ།། དེའི་འོག་ཏུ་ནི་ཙནྡན་དམར་པོ་དང༌། ཨ་བྷ་རའི་ཁུ་བ་ལ་སོགས་པ་རྨད་དུ་བྱུང་བའི་གཏོར་མ་དང་སྦྱིན་སྲེག་སྟོང་ཕྲག་བཅུས་མཉེས་པར་བྱ། དེ་ཐམས་ཅད་དུ༌།  འདོད་པའི་དོན་ལ་གསོལ་བ་གདབས་པར་བྱའོ། སྒྲུབ་པོ་གང་ཟག་གི་ཆོ་ག་རྣམས་བརྩམས་ཤིང༌། རང་ཉིད་དངོས་གྲུབ་མཆོག་གི་དོན་དང༌། ལྷོ་ཕྱོགས་ཀྱི་སྐྱེ་བོ་མང་པོ་ལ་ཕན་པ་དང་བདེ་བའི་ཕྱིར། གྲོང་ཁྱེར་ཀ་ལཱ་པར་འཇུག་པར་འདོད་པས། སྡིག་མེད་ཅིང་གཡོ་རྒྱུ་མེད་པའི་དེ་དག་ནི་འཆད་པར་འགྱུར་བའི་རིམ་པ་འདིས། ངེས་པར་དེར་ཕྱིན་པར་འགྱུར་གྱི། བར་མ་དོར་ཉེས་པར་མི་འགྱུར་རོ།། གལ་ཏེ་བདག་གི་ཚིག་འདི་རྫུན་པར་གྱུར་ན་བདག་གི་མཚམས་མེད་པ་ལྔ་བྱས་པར་འགྱུར་རོ།། ཅི་སྟེ་མཆོག་འཁྲུལ་བའམ། སྡིག་པའི་སེམས་དང་ལྡན་པ་གཅིག་ཡིན་ན་ནི། ཀླུ་ཕྲན་ནམ། ལྟོ་ཕྱེ་འམ། གནོད་སྦྱིན་ནམ། འབྱུང་པོ་འམ། ལྷ་གང་དག་གཏུམ་པོ་རྣམས་ཀྱི་ཆད་པ་ཐོབ་པར་འགྱུར་གྱི་སྒྲུབ་པ་ནི་ནམ་ཡང་མ་ཡིན་ནོ།། འདི་གྲུབ་པ་ནི་དཀའ་བ་མིན། འབྱོར་བའི་ཁྱད་པར་གཞན་དང་གཞན། །སྔགས་དང་རླུང་གི་ལས་རྣམས་ཏེ། །རྒྱུད་ཀྱི་བགྲོད་པ་གཞན་ཡིན་ནོ། ཤིན་ཏུ་ཉམས་ཆུང་འདི་མི་འགྲུབ། །སྒྲུབ་པོ་ནུས་ལྡན་འགྲུབ་འདོད་པས། །མ་གྲུབ་དེ་ལྟར་ལེགས་ཐོབ་འགྱུར། །རིག་པའི་ཆོ་ག་འདི་ཡིས་སོ།། དེ་ནས་སྒྲུབ་པ་པོ་དེས། གང་དུ་དེ་བཞིན་གཤེགས་པ་རྣམས་མངོན་པར་རྫོགས་པར་བྱང་ཆུབ་པའི་ཤིང་ཨ་ཤྭྭད་ཐ་ལ་མཆོད་པ་སྟོང་གིས་ཡང་དག་པར་མཆོད་ནས། ལམ་དུ་འཇུག་པར་བྱ་སྟེ།

          གླིང་འདིའི་ནུབ་ཕྱོགས་ཀྱི་རྒྱ་མཚོ་རཏ་ན་སཱ་ག་ར་ཞེས་བྱ་ལ། དེད་དཔོན་མཆོག་དང་ལྷན་ཅིག་གྲུ་ལ་ཞོན་པས་བྱང་ཕྱོགས་སུ་བགྲོད་དེ། གླིང་སི་ཀོ་དྷ་ར་ཞེས་བྱ་བ་དང༌། དྷ་ན་ཀོ་ཥ་ཞེས་བྱ་བའི་གླིང་དུ་བགྲོད་པར་བྱའོ།། གླིང་དེའི་ནུབ་ཕྱོགས་ན་ཀླ་ཀློའི་གྲོང་ཡོད་དེ། སྒྲུབ་པ་པོ་དེར་འགྲོ་བར་མི་བྱ་ཞིང༌། ཤར་གྱི་ཕྱོགས་ལ་ཉེ་བར་བརྟེན་པའི་གྲོང་ཁྱེར་དུ་ཟླ་བ་དྲུག་སྡོད་པར་བྱའོ།། དེ་ན་བདེ་བར་གཤེགས་པ་གསེར་ཐུབ་ཀྱི་མཆོད་རྟེན་ཡོད་དེ། དེ་ལ་བསྐོར་བ་སྟོང་ཕྲག་ལྔ་བྱས་ཏེ། དེ་བཞིན་གཤེགས་པའི་ཡི་གེ་བརྒྱ་བ་འདོན་པར་བྱའོ།། དེ་ནི་འདི་ཡིན་ཏེ། ན་མ་སྟྲཻ་ཡཱ་དྷྭི་ཀ་ནཱཾ། ཏ་ཐཱ་ག་ཏཱ་ནཾ། སརྦ་དྲ་ཨ་པྲ་ཏི་ཧི་ཏ། བི་སྟ་དྷརྨ་ཏཱ་བ་ལི་ནཱཾ། ཨོཾ་ཨ་ས་མ་ས་མནྟ་ཏོཉ། ཨ་ནནྟ་བཱསྟི་ཤ་ས་ན། ཧ་ར་ཧ་ར། སྨ་ར་སྨ་ར་ཎ། མིག་ཏ་རཱ་ག བུདྡྷ་དྷརྨ་ཏེ་ས་ར་ས་ར། ས་མ་བ་ལ། ཧ་ས་ཧ་ས། དྲ་ཡ་དྲ་ཡ་ག་ག་ན། མཧཱ་བ་ར་ལཀྵ་ཎེ། ཛྭ་ལ་ཛྭ་ལ་སཱ་ག་རེ་སྭཱ་ཧཱ།  དད་པ་སྟོབས་ཞན་དེ་དང་དེས། །ནམ་ཡང་འགྲུབ་པ་ཡོད་མ་ཡིན། །ཆོ་ག་མི་སྨོད་གཞན་ལ་མིན། །ལྷ་དང་ཆོས་ལ་འཕྱས་མི་གདགས། །ངེས་པར་འགྲུབ་སྙམ་ཡིག་བརྟན་དང༌། །ཤིན་ཏུ་དད་པའི་ཤུགས་སྟོབས་ཀྱིས། །འབྱོར་བ་དང་ནི་གྲོལ་བ་སྟེ། །དགེ་ཆོས་འཇོམ་ལ་ནམ་ཡང་མིན། །དེ་ནས་སྒྲུབ་པ་པོ་དེ་གྲུའི་བགྲོད་པས། བྷ་ར་ཏིའི་དུམ་བུ་འདི་ཉིད་དུ་འོང་བར་བྱ་སྟེ། གཞན་དུ་ན་ནོར་གྱི་མཛོད་ཅེས་བྱ་བའི་གླིང་དེ་ཉིད་ལས་བྱང་གི་ཕྱོགས་ལ་ཉེ་བར་བརྟེན་པའི། གླིང་གཞན་དང་ཡུལ་མཐའ་གཞན་མང་པོ་དག་ནི་ལེག་པར་སྤྱོད་པ་མ་ཡིན་པའི་ཕྱིར་རོ།། སྒྲུབ་པ་པོ་ཀུན་ཏུ་འཁྱམས་པར་འགྱུར་རོ།། དེ་ལ་གླིང་འདི་ནི་ཆུ་ཀློང་སྔོན་པོ་ཞེས་བྱ་བའི་མཚོ་དང་འབབ་ཆུ་དག་དང་ཤར་ནུབ་ཏུ་ཐད་མཉམ་པ་ཡིན་ཏེ། དེའི་ཕྱིར་དབང་པོའི་ཕྱོགས་བོར་ནས་སྒྲུབ་པ་པོ་དབང་ལྡན་གྱི་ཕྱོགས་སུ་འགྲོ་འོ།། གྲོང་ཁྱེར་རུག་མ་དང༌། རཱ་པ་རི་དང༌། ཀ་ཊི་ཀཱི་ལ། མ་དྷུ་ཝཱན་དྷ་ལ་སོགས་པ། བྱང་ཕྱོགས་ནས་བྱང་ཕྱོགས་སུ་ཟླ་བ་དྲུག་དུ་བགྲོད་པར་བྱ་སྟེ། དེ་དག་གི་ཕ་རོལ་ན་ཆུ་བོ་ཆེན་པོ་ས་ཏྲུ་ཞེས་བྱ་བ་དང༌། ཀ་རི། ཀ་ཀཱ་རི་ཞེས་བྱ་བ་གངས་ཀྱི་རི་ཡོད་དེ་དག་ལས་ཀྱང་བརྒལ་བར་བྱའོ།། ཡུལ་འཁོར་དེ་རྣམས་ན་གནས་པའི་མི་རྣམས་ནི། དྲང་པོའི་རང་བཞིན་ཅན་གྱི་ཕྱིར། བགྲོད་པར་དཀའ་བ་མ་ཡིན་ཞིང་འཇིགས་པ་ཡང་མེད་དོ།། རི་དེ་ལ་རུ་ཛ་ན་ཡ་ཞེས་བྱ་བའི་སྨན་རོ་མཆོག་ཏུ་མངར་བ་དང༌། ཏཱི་ལ་ཀ་ཞེས་བྱ་བ་ཤིན་ཏུ་ཁ་བ་སྟེ། དེ་དག་ཀྱང་འོ་མ་ལྟར་འཛག་པ་དག་ཡོད་དོ།།

          གང་གི་མེ་ཏོག་ཉི་མ་འཆར་ཀའི་མདངས་ལྟར་རབ་ཏུ་དམར་བ། དེའི་འདབ་མ་ཡང་དགྲ་སྟའི་སོ་ལྟ་བུ། ཚེར་མ་རྣོན་པོ་ཅན། ལྟོ་ངོས་སུ་མངོན་དུ་ཕྱོགས་པའི་བྲག་ལས་འབྱུང་བ་དེ་ནི་རུ་ཛ་ན་མ་ཡིན་ནོ།། ངམ་གྲོག་དག་གི་ངོས་ལ། འཕྱངས་ཞིང་འཕྱང་ན་མ་ཧེ་མོའི་ནུ་མ་ལྟ་བུའི་མེ་ཏོག་དཀར་པོ་དང་ལྡན་པ་ནི། ཏཱི་ལ་ཀའོ།། དེ་དག་གི་ཕྱོགས་བཞིར། རྡོ་རྗེ་སྲིན་པོ་སྟོབས་པོ་ཆེའི་རིག་སྔགས་ལན་བདུན་བཟླ་བཞིན་དུ། ཤིང་བ་ཏ་ལའི་ཕུར་བུས་བཏབ་ནས། དེ་དག་གི་བ་ཐག་དབྱུང་བར་བྱའོ།། ཞག་བདུན་དུ་དེ་དག་ཡོངས་སུ་སྐམ་པར་བྱས་ནས། བྲག་གི་ཕུག་པར་བདུད་རྩི་ཐལ་སྦྱོར་བཟླས་པའི་བསྲུང་ཞིང་སྦ་བར་བྱའོ།། ཕྱོགས་ཏེ་ན་བཙག་ཁ་དོག་ལྔ་པོ་དག་ཡོད་དེ། དཀར་པོ་དང་སེར་པོ་དང་དམར་པོ་དང་ནག་པོ་དང་ལྗང་ཁུ་དག་སྟེ། དེ་དག་བླངས་ནས་གངས་ཀྱི་ཆུ་བོས་ཁྲུས་བྱས་ནས་རྡོ་ལེབ་དཀར་པོ་ཞིག་ལ་ལྷ་མོ་འོད་ཟེར་ཅན་མའི་སྐུ་གཟུགས་བྲི་བར་བྱ་སྟེ། མདོག་གསེར་བཙོ་མ་ལྟ་བུ་ཀ་ར་བཱི་རའི་མེ་ཏོག་ལྟར་དམར་བའི་སྤྱན་གསུམ་པ། གཡས་ཀྱི་ཞལ་དམར་པོ། གཡོན་གྱི་ཞལ་ནི་ཕག་གི་གདོང་ནག་པོ་རབ་ཏུ་འཁྲོས་པ། དར་སྔོན་པོའི་ག་ཤ་འཕྱང་བ། ནམ་མཁའི་ཕྱག་རྒྱ་ཅུང་ཟད་གསལ་བར་བྱེད་པའི་ལྷ་དང་ལྷ་མ་ཡིན་དང་དབང་ཕྱུག་རྣམས་དབང་དུ་བྱེད་པ། ཕྱག་དང་པོ་གཉིས་ཀྱིས་མེ་ཏོག་གི་མདའ་དང་གཞུ་འགེངས་པ། བར་མ་གཉིས་ཀྱི་ཁབ་དང་སྐུད་པ་དང་མྱ་ངན་མེད་པ་བསྣམས་པ། ཐ་མ་གཉིས་ཀྱིས་ཐོད་པ་དང་ཁ་ཊཱཾ་ག་ལྟེ་བའི་གཡས་གཡོན་དུ་འཛིན་པ། ཕག་གི་སྟེང་ན་སྡང་བ་དང་གདུག་པ་ཅན་ཐམས་ཅད་ཡོངས་སུ་གནོན་པ། འདི་ལྟ་བུ་བྲིས་ནས་ཆོ་ག་ཇི་ལྟ་བས་མཆོད་པ་དང་བཟླས་པ་བྱའོ།། དེ་ལ་སྔགས་འདི་ཡིན་ཏེ། ན་མོ་རཏ་ན་ཏྲ་ཡཱ་ཡ། ཏད་ཐཱ། ཨོཾ་བ་ཏཱ་ཡི་བ་དཱ་ཡི། བ་ར་ལི་བ་ར་ཧ་མུ་ཁི་སརྦ་དུཥ་ཊན་པྲ་དུཥ་ཊན་བནདྷ་བནདྷ་མུ་ཁཾ་སྭཱ་ཧཱ། ཅེས་པ་འདི་ཨ་ཤོ་ཀའི་ཤིང་དང་མེ་ཏོག་དམར་པོ་བརྒྱ་ཕྲག་ལྔས་སྦྱིན་སྲེག་བྱའོ།། སྙིང་པོའི་སྔགས་འདི་ཡང་ཁྲི་ཕྲག་བཟླས་པ་བྱ་སྟེ། ཨོཾ་བཛ་བྷཻ་ཏཱ་ལི་ཧཱུཾ་ཕཊ། ཚངས་པར་སྤྱོད་ལ་ལེགས་གནས་ནས། །སྙིང་རྗེས་སྒྲུབ་པ་ལེགས་པ་སྟེ། །གདུག་ལ་གདུག་པ་ངེས་སྦྱོར་ལ། །རྟག་ཏུ་བྱམས་པའི་ཡིད་ཀྱིས་སོ། །གང་གང་འདུལ་བ་དེ་དང་དེ། །སྔགས་པའི་རབ་སྦྱོར་དེ་དེ་འོ། །ཉོན་མོངས་སྤྱོད་ལས་ནམ་ཡང་མིན། །ནང་གི་བདག་ཉིད་དུལ་བས་སོ། །

          དེའི་འོག་ཏུ་བདུད་རྩི་འཛག་པའི་སྨན་དེ་དག་བཏགས་སྟེ། གངས་ཀྱི་བ་མེན་དག་གི་འོ་མ་ལྟུང་བ་ལ་ཡོངས་སུ་བསྐོལ་ནས་བཅོམ་ལྡན་འདས་མའི་སྤྱན་སྔར་བཞག་པར་བྱའོ།། སྙིང་པོའི་མཐར་བདུད་རྩི་ཐིག་པ་སྒྲུབ་ཤིག་ཅེས་སྤེལ་བས། ལན་སྟོང་དུ་བཟླས་པར་བྱས་ན། ལྷ་མོ་ཡང་དག་པར་མཆོད་དེ་དངོས་གྲུབ་བླངས་ནས་སྨན་བཏུང་བར་བྱའོ།། ཕྱིས་ནས་སྐུ་གཟུགས་དེ་ཡང་བྱང་ཕྱོགས་ལ་བལྟས་ཏེ་བཞགས་ལ། མེ་ཏོག་དང་འབྲས་བུ་སྣ་ཚོགས་པས་སྦ་བར་བྱའོ།། དེས་ནི་བཀྲེས་པ་དང༌། སྐོམ་པ་དང༌། ངལ་བ་དང༌། དུབ་པ་མེད་དེ། ལྷ་མོའི་མཐུ་ལས་བར་དུ་གཅོད་པ་ཐམས་ཅད་ཀྱང་བདག་གི་དབང་དུ་བྱེད་པར་འགྱུར་རོ།། དེ་ནས་བྱང་ཕྱོགས་སུ་བལྟས་ནས་ཉིན་ལམ་ཉི་ཤུ་རྩ་གཅིག་ཏུ་འགྲོ་བར་བྱ་སྟེ། ལམ་དེ་ལ་ནི་རྩ་ཡང་མེད། ཤིང་འགེལ་བ་ཡང་མེད། ཆུ་ཡང་མེད་དོ།། དེའི་ཕ་རོལ་ན་ནགས་འཐུག་པོ་དག་ཡོད་དེ། སྦྲུལ་དང་སྟག་ལ་སོགས་པ་གནས་པའི་འབྲོག་དགོན་པའི་ལམ་ལ་ཉི་མ་བཅུ་གཉིས་འགྲོ་བར་བྱའོ།། དེའི་ཕ་རོལ་ན་རིའི་རྒྱལ་པོ་གན་དྷ་ར་ཞེས་བྱ་བ་ཡོད་དེ། དཔངས་སུ་དཔག་ཚད་ཉི་ཤུའོ།། རི་དེ་ནི་སྨན་སྣ་ཚོགས་ཀྱི་གང་བ་ཡིན་ནོ།། དེ་ན་ནི་སེང་གེ་གཤོག་པ་ཅན་དག་གནས་ཏེ། ཉི་མ་རེ་རེར་ཡང་སྲོག་ཆགས་མང་པོ་དག་གསོད་པར་བྱེད་དེ། དེར་རི་དྭགས་ཀྱི་ཁྱད་པར་ཞིག་ལུས་བསྒྱུར་བ་ཞེས་བྱ་བ་ཡོད་དོ།། དེ་ལུས་ཀྱི་ཁྱད་པར་རྣམ་པ་སྣ་ཚོགས་པར་བསྒྱུར་བ་ཡིན་ཏེ། དེ་སེང་གེ་དེས་བསད་པའི་ཁྲག་ལས། རྡོ་ལེབ་ནག་པོ་ལ་སྲིན་མོ་མན་དེ་ཧ་ཞེས་བྱ་བ། རྣམ་པར་གཙིགས་ཤིང་འཇིགས་སུ་རུང་བའི་ལུས་ཅན། ཁ་དོག་འབར་བ་མི་ཡིས་ལྤགས་པས་སྨད་དཀྲིས་ཤིང༌། ལག་པ་གཡོན་པ་ན་རལ་གྲི་འཛིན་པ། གཡས་པ་ན་བ་ལང་གི་ལྤགས་པ་གསར་བའི་ནང་དུ་ཤ་ཁྲག་དང་སྙིང་གི་གང་བ་འཛིན་ཅིང་ཟ་བར་བྲིས་ཏེ། སྣོད་དག་ཏུ་ཤ་ཁྲག་གི་གཏོར་མ་བཤམས་པར་བྱའོ།། བདག་ཉིད་གཤིན་རྗེ་མཐར་བྱེད་མི་བཟད་པ་དབྱུག་པ་དང་ཞགས་པ་ཐོགས་པ་མ་ཧེ་ལ་གནས་པར་བྱས་ནས། ཨོཾ་ཧྲཱིཿཀཱ་ལ་རུ་པ་ཧཱུཾ་ཁཾ་སྭཱ་ཧཱ། ཀྲིཾ་ཀ་རེ་ཀྲིཾ་ཀ་རེ། མན་དྷེ་ཧ་རཀྵ་སཱི། ཨཱ་གཙྪ་ཨཱ་གཙྪ་ཧྲཱིཿཛ་ཞེས་སྟོང་ཕྲག་བཅུར་བཟླས་ནས། དེ་མངོན་དུ་འོང་བར་འགྱུར་ལ། ཁྲག་གི་མཆོད་ཡོན་དང་ཤའི་གཏོར་མ་དག་སྦྱིན་ལ། ཐོད་པའི་ཕྱག་རྒྱ་བསྟན་ཏེ། ཁྲོ་བོ་ཆེན་པོའི་སྟོབས་ཀྱིས་གཟེར་བར་བྱའོ།། དེས་ཀྱང་སྒྲུབ་པ་པོ་ཅི་འདོད་ཅེས་སྨྲ་བར་འགྱུར་རོ།། ཀྱཻ་སྲིན་མོ་བདག་སེམས་ཅན་ཐམས་ཅད་ལ་ཕན་པར་འདོད་པས་བདེ་བར་འདོད་པས། གྲོང་ཁྱེར་ཀ་ལཱ་པར་འགྲོ་ཡི། ཡུལ་སྟོང་པ་འདི་རྣམས་སུ་ཁ་ཟས་འབྱོར་བར་གྱིས་ཤིག དེས་ཀྱང་དེ་བཞིན་དུ་བྱའོ།། དེ་ནས་མི་སྣང་བར་གྱུར་ཏེ། ཤིང་ཨར་འཇུ་ནིའི་རྩ་བ་ལ། རབ་ཏུ་ཆགས་པ་མེ་ཏོག་ཀུནྡ་ལྟར་ཁ་དོག་དཀར་བའི་བཅུད་རོ་སྦྲང་རྩི་འདྲ་བ་དག ཉིན་མོ་དང་ནུབ་མོ་གནས་པའི་ས་དག་ལ་གནས་པར་འགྱུར་རོ།། དེ་ནས་བྱང་ཕྱོགས་སུ་གངས་ཅན་ཆེན་པོ་ཞེས་བྱ་བའི་རི་ཡོད་དེ། དཔག་ཚད་བརྒྱ་ཕྲག་གསུམ་གྱི་ཁོར་ཡུག་ཅན་དེ་ན་གནོད་སྦྱིན་རྣམས་དང༌། དཀའ་ཐུབ་ཅན་རྣམས་དང། གྲུབ་པ་རྣམས་དང། མི་འམ་ཅི་དག་གིས་ཡོངས་སུ་གང་བ་ཡིན་ནོ།། ཅི་སྟེ་སྒྲུབ་པ་པོ་ཕ་རོལ་གནོན་པའི་རྫུ་འཕྲུལ་དང་ལྡན་པ་ཡིན་ན་ནི། དེར་སོང་ནས་དགའ་བར་བྱ། རྩེ་བར་བྱ། ལོངས་སྤྱོད་དག་ཀྱང་བྱ་སྟེ། དེ་ནས་མཐར་གྱི་དེ་དག་གི་ཕྲག་པ་ལ་ཐོག་ནས་གྲོང་ཁྱེར་ཀ་ལཱ་པར་ཡུད་ཀྱི་ཕྱིན་པར་འགྱུར་རོ།། ཅི་སྟེ་ཕ་རོལ་གནོན་པའི་སྟོབས་རེ་མེད་ན་ནི་དེར་འགྲོ་བར་མི་བྱ་སྟེ། རླུང་གི་ཕྱོགས་ཀྱི་ལམ་ཆེན་པོ་རབ་ཏུ་གསལ་བ་ལ་ཉེ་བར་བརྟེན་ཏེ་མྱུར་བར་འགྲོ་བར་བྱའོ།། སྲིད་གསུམ་གནས་ཀྱི་རྒྱུད་རྣམས་ནི། །བསོད་ནམས་ཆུང་ཡང་འགྲུབ་པར་སླ། །ཚངས་འཇོམས་དེ་ཡིས་གྲོགས་ཀྱང་བྱེད། །ཆེ་བའི་ཆེ་བའང་རྙེད་མ་ཡིན། །རྟག་ཏུ་དགེ་བའི་སྟོབས་དང་ལྡན། །བདག་མེད་དོན་གྱི་དེ་ཉིད་རིག །བྱང་ཆུབ་སེམས་ནི་ཡང་དག་བསྐྱེད། མཆོག་གི་རིག་སྔགས་དེ་ཡིས་འགྲུབ།།

          གངས་རི་དེ་ལ་ཤར་དང་ནུབ་ཏུ་ཆུ་བོ་རབ་ཏུ་འབབ་པའི་གཞི་ལ་ལུ་མ་ཆེན་པོ་སྟོང་ཕྲག་བརྒྱད་ཅུ་དང་ཡོངས་སུ་འདྲེས་ཏེ། མཚོ་ལྟར་སྣང་ཞིང་རྒྱུ་བ་ཡང་མི་མངོན་པ་ཁ་དོག་དཀར་པོ་སྣང་བ་ཡོད་དོ།། དེ་ལ་ཆུ་བོ་སུ་ཏ་ཞེས་བྱའོ།། ཆུ་ཀླུང་འདི་ནི་དཀྱུས་སུ་དཔག་ཚད་སྟོང་ཕྲག་ཕྱེད་དང་གསུམ་པ། ཤར་དང་ནུབ་ཏུ་རྒྱ་མཚོ་དུག་ཅན་པ་ལ་སོགས་ཡོངས་སུ་འཇུག་པ། ཞིང་དུ་དཔག་ཚད་ཙམ་མོ།། ཆུ་འདི་ནི་ཤིན་ཏུ་གྲང་བ་ཡིན་ཏེ། དམྱལ་བའི་འགྲོ་བ་མ་གཏོགས་པ། བྱ་དང་ཉ་ཆུ་སྲིན་ལ་སོགས་པ་སྲོག་ཆགས་འགའ་ཡང་མེད་དོ།། ཆུ་བོ་དེའི་ཚུར་འགྲམ་ན་ཟངས་ཀྱི་མདོག་ཅེས་བྱ་བའི་རི། ཕུག་པ་སྟོང་དང་ལྡན་པ་དག་ཡོད་དེ། ཤིང་རི་ཥ་ཀ་དང༌། ཀུ་ལུ་མ་ཀ་དང༌།ཏ་མ་རུ་དང༌། དེ་བ་ད་རུ་དང༌། ཤུགས་པའི་ཡོངས་སུ་གང་བ་ཡིན་ནོ།། རི་དེ་ལ་ནི་སྲིན་མོ་གློག་འགྱུ་མ་ཞེས་བྱ་བ་གནས་ཏེ། དེའི་ཚེ་ཆོ་ག་ལ་ཡང་སྔ་མ་དང་མཚུངས་པ་ལས། ལག་ན་ནི་གཏུན་ཤིང་འཛིན་པ། གླང་པོ་ཆེན་པོའི་ལུས་ལ་ཟ་བ། ཆར་སྤྲིན་གྱི་མདོག་ཅན་ཏེ། གཉཛ་དང༌། ཧ་རི་ན། ནགས་ཀྱི་བ་ལངས་དང༌། གླང་པོ་ཆེའི་ཁྲག་རྣམས་ཀྱི་བྲི་བར་བྱ་ཞིང༌། གཏོར་མ་ཡང་དེ་དག་རྣམས་ཉིད་དོ།། བདག་ཉིད་རྣལ་འབྱོར་ནི་ཁྲོ་བོ་གཤེན་རྗེ་གཤེད་པོ། ཞལ་དྲུག་པ་དུས་མཐའི་སྤྲིན་དང་མཚུངས་པ། ཞབས་དྲུག་པ། ཕྱག་བཅུ་གཉིས་པ་རལ་གྲི་དང༌། དགྲ་སྟ་དང༌། གྲི་གུག་དང༌། ག་དཱ་དང༌། འཁོར་ལོ་དང༌། དྲི་ཤུལ་ལ་རྣམས་གཡས་ན་འཛིན་པའོ།། གཤིན་རྗེའི་དབྱུག་པ་དང༌། དུས་ཀྱི་ཞགས་པ་དང༌། ཁ་ཊཱཾ་ག་དང༌། ལྕགས་ཀྱུ་དང༌། ཐོད་པ་ཁྲག་གིས་གང་བ་དང༌། སྡིག་འཛུབ་རྣམས་ནི་གཡོན་པ་ནའོ།། རྣམ་པ་འདི་ལྟ་བུ་ལས་སྔགས་འདི་ཡིན་ཏེ། ཨོཾ་སརྦ་དུཥ་ཊ་སྟམ་བྷ་ཡ་ཧཱུཾ། ན་དཱི་ཝཱ་ར་ཎི་ཀུ་མཱ་ར་ཀྲཱི་ཊ་རུ་པི་ཎི་བན་དྷ་བན་དྷ་ས་མཡ་མ་ནུ་ས་མ་ཕཊ་ཕཊ་སྭཱ་ཧཱ། ཞེས་པའོ།། བི་ཡུ་ཙ་ལ་ཙ་ལ། པྲ་ཙ་ལ་པྲ་ཙལ། བིང་ཡུ་ཛི་སྭཱ་ཧཱ། ས་ཧ་པྲ་མུ་ཁ། ས་ཧ་པྲ་བ་ཧ་བེ་ ར་ར་ར་ར་རཀྵ་སི་བྷོཿབྷོཿ ཨ་ཀརྵ་ཡ་ཛཿ ཅེས་པ་ནི་སྲིན་མོའི་སྔགས་སཽ།། དེ་ནས་སྒྲུབ་པ་པོ་ལམ་སྟོན་ཅིག་ཅེས་བརྗོད་པར་བྱ་སྟེ། དེས་ཀྱང་ཆུ་བོ་སི་ཏ་ལ་ལམ་སྟོན་པར་འགྱུར་ཏེ། ཆུ་ཀླུང་དེའི་རབ་ཏུ་གྲང་བས་ནི། སའི་སྟེང་གི་གངས་དང་རླུང་རེག་པ་ཐམས་ཅད་ཀྱང་ཟིལ་གྱིས་གནོན་པའི་ཕྱིར། དགུན་ཟླ་འབྲིང་བོ་ལ་ཡང་ཆབ་རོམ་ཆགས་པ་མེད་ན། སྲིན་མོའི་རྫུ་འཕྲུལ་གྱིས། དབྱར་ཟླ་དང་པོའི་ཡང་ཆབ་རོམ་ཤིན་ཏུ་བརྟན་པར་ཆགས་ནས་སྒྲུབ་པ་པོ་འཇིགས་པ་མེད་པ་ཉིད་ཀྱིས་ཆུ་བོའི་ཕ་རོལ་ཏུ་འགྲོ་བར་འགྱུར་རོ།། ཆུ་བོ་འདི་ནི་བྷ་ར་ཏའི་དུམ་བུ་ཞེས་བྱ་བ། གླིང་འདིའི་ཕྱེད་ཀྱི་དབུས་ལ་རྒྱུ་བ་ཡིན་ཏེ། ལྷོ་དང་བྱང་དུ་ཡུལ་ཆེན་པོ་དགུ་བཅུ་རྩ་དྲུག་དང༌། དགུ་བཅུ་རྩ་དྲུག་དག་གནས་པ་ཡིན་མོད་ཀྱི། འོན་ཀྱང་ཤར་ནུབ་ཏུ་ནི་བྱང་ཕྱོགས་ལྷག་པར་ཡངས་པ་ཡིན་ནོ།། ཆུ་བོ་དེའི་ཕ་རོལ་ན་ཤིང་ཀེ་ཏ་དང༌། བཻ་ལ་དང༌། ཀ་བྷི་ཏ་དང༌། པ་རུའ་ཥ་དང༌། བ་ད་ར་དང༌། ཀ་སི་ཏ་དང༌། ཨར་ཛུ་ན་དང༌། ཏ་ལའི་ནགས་ཚལ་དག་ཡོད་དེ། དེར་ཟླ་བ་གཅིག་ཏུ་ངལ་གསོ་བར་བྱ། རྩ་བ་དང་འབྲས་བུ་དང་ལོ་མ་དང་མེ་ཏོག་དག་ནི་བཅུད་དང་ལྡན་པ་དང་མཐུ་དང་ལྡན་པ་དག་ཡིན་ནོ།།

          དེར་ལྷ་མོ་སྐུལ་བྱེད་མའི་རིག་པ་སངས་རྒྱས་བྱེ་བ་ཕྲག་བདུན་གྱིས་བྱིན་གྱིས་རླབས་པ། ཡི་གེ་དགུ་བའི་གཟུངས་སྔགས་སྟོང་ཕྲག་ལྔ་བཟླས་པས། སྒྲུབ་པ་པོ་རང་གི་ཡན་ལག་ལས་ཁྲག་ནག་པོ་ནག་པོར་སྣང་བ་དག་ཟག་པར་འགྱུར་རོ།། ཅི་སྟེ་རྨི་ལམ་དུ་དེ་ལྟར་གྱུར་ན་ཡང་རུང་སྟེ། ལུས་ནད་མེད་ཅིང་སྟོབས་དང་ལྡན་པ་དང༌། ཤིན་ཏུ་ཡང་བར་འགྱུར་རོ།། དམ་ཚིག་རྣམ་པར་སྤོང་དང་བླ་མ་རྨོད། །དུས་མིན་འཆི་དང་དམྱལ་བ་བརྒྱད་པར་འགྲོ། །དཀྱིལ་འཁོར་མ་མཐོང་དབང་བསྐུར་དམན་པ་ཡང༌། །རིག་སྔགས་སྦྱོར་བ་ནམ་ཡང་གྲུབ་པ་མེད། །ཁེངས་ཤིང་ང་རྒྱལ་ཁྲོ་ལ་མི་བདེན་པ། །དངོས་གྲུབ་ཐོབ་ཅེས་རྒྱལ་བས་མི་གསུངས་ཏེ། །མི་རྟག་སྡུག་བསྔལ་སྟོང་བའི་དོན་སེམས་པ། །མི་དེ་དག་ནི་མྱུར་འགྲུབ་འཕགས་རྣམས་གསུངས། །རིགས་དང་གཟུངས་དང་ནོར་བུ་དབང་ཕྱུག་དང༌། །ཆོས་དང་རིག་པ་སྔགས་ཀྱི་མྱོས་པ་སྤངས། རྨི་ལམ་གཟུགས་བརྙན་དྲི་ཟའི་གྲོང་ཁྱེར་བཞིན། །བྱེད་པོ་བྱ་བ་དང་ནི་ལས་རྣམས་མཐོང༌། །མ་ཆགས་དུལ་དང་ཡང་དག་མཉན་པའི་སེམས། །མཆོད་དང་སྦྱིན་པ་བཟོད་དང་བརྩོན་འགྲུས་བསྐྱེད། །བདག་དང་བདག་གིས་སྦོང་ལ་མངོན་དགའ་བ། །དེ་དག་དངོས་གྲུབ་མཆོག་ལ་རེག་པར་འགྱུར།། ཡང་དེ་ནས་ནགས་ཚལ་དེ་ལས་ཁངྦུ་ཛའི་འབྲས་བུ་གསེར་གྱི་མདོག་དང་མཉམ་པ་དག་བླངས་ཏེ། ལམ་རྒྱགས་སུ་འཁུར་བར་བྱའོ།།

          འདིར་ནི་སྒྲུབ་པ་པོ་རང་ཉིད་ཀྱིས་ཅི་ཙམ་ལེན་ནུས་པ་དེ་འཁུར་བར་བྱ་བའི་ནམ་ཡང་ལྕིད་ཀྱིས་ནོན་པར་མི་འགྱུར་བས། མི་ཐེག་པར་དོགས་པ་མི་བྱའོ།། ནགས་དེ་ཉིད་བར་མཚམས་མེད་པར་གངས་ཀྱི་རི་ཆུང་ངུ་དག་གྲལ་དུ་བསྒྲིགས་པས་ཤར་ནུབ་ཀྱི་རྒྱ་མཚོའི་བར་ཁྱབ་པ་ཡིན་ནོ།། དེ་དག་ལས་ཆུ་འབབ་པ་ཐམས་ཅད་ཀྱང་ལྷོ་ཕྱོགས་ཀྱི་ངོས་སུ་འབབས་པ་ཡིན་པའི། དེ་དག་ཏུ་ཆུ་མང་པོ་ཅན་ནོ༑ རི་དེ་དག་ལས་བརྒལ་ནས་བྱང་ཕྱོགས་སུ་དཔག་ཚད་ལྔ་བཅུ་ཚུན་ཆད་ན་ནི་འཐུང་དུ་རུང་བའི་ཆུ་མེད་པ་ཡིན་ནོ།། འོན་ཀྱང་སྒྲུབ་པ་པོ་དེ་ལུས་སྟོབས་དང་ལྡན་པ་དང་ཡང་བའི་ཕྱིར། ཞག་བདུན་དུ་ཐང་ཆེན་པོའི་ཕ་རོལ་ཏུ་ཕྱིན་པར་འགྱུར་ལ། ཁངྦུ་ཛའི་འབྲས་བུ་དེ་ཟོས་པའི་བཀྲེས་པ་ཡང་མེད། སྐོམ་པ་ཡང་མེད་དོ།། ཐང་དེ་འདས་པ་ན། སྔོན་མང་དུ་ཁྱེར་དུ་ཟིན་ཡང་རུང་སྟེ། འབྲས་བུ་དེ་ཡང་ཟད་པར་འགྱུར་རོ།། དེའི་ནུབ་ཀྱི་མཚམས་ན་རི་བོ་ཤིན་ཏུ་དཀར་བ་ནགས་ཚལ་ཡིད་དུ་འོང་བ་དུ་མས་མཛེས་པ་ཞིག རྒྱང་རིང་མོ་ནས་མཐོང་བར་འགྱུར་མོད་ཀྱི། སྒྲུབ་པ་པོ་དེར་འགྲོ་བར་མི་བྱ་སྟེ། དེ་ཅིའི་ཕྱིར་ཞེ་ན། སྲིན་མོ་ཟངས་ཀྱི་མཆུ་ཅན་ལྔ་བརྒྱ་དག་གནས་ཏེ། ལྷ་མ་ཡིན་གྱི་ཕོ་ཉ་མོ་དེ་དག་གི་སྒྲུབ་པ་པོ་ལ་འཚེ་བར་བྱེད་པའི་ཕྱིར་རོ།། དེ་ལྟ་བས་ན་བྱང་ཕྱོགས་དྲང་བོའི་ལམ་པོ་ཆེ་བཟུང་ནས་འགྲོ་བར་བྱའོ།། ཉི་མ་གཅིག་གིས་རི་བོ་ཀེ་ཏ་ར་ཕྱིན་བར་འགྱུར་རོ།། དེ་ཡང་ཁ་དོག་ནག་ཅིང་ངམ་པ་འཇིགས་པ་བསྐྱེད་པར་བྱེད་པ། ཀ་བ་བཙུགས་པ་ལྟ་བུ་དཔག་ཚད་བཅུའི་དཔང་དང་ལྡན་པ་ཡོད་དོ།། རི་དེའི་ནང་གི་གསེར་དངུལ་འབའ་ཞིག་གིས་གང་བ་ཡིན་ཏེ། དེའི་ཕྱོགས་བཞི་ན་ནི་པདྨ་དང་ཨུཏ་པ་ལའི་མཚོ། ངང་བ་དང་ཙཀྲ་བཱ་ག་དང༌། ཀ་རཱཎ་ཊ་ལ་སོགས་པ། ཆུ་ལ་རྒྱུ་བའི་འདབ་ཆགས་གཟུགས་དང་ཁ་དོག་མཛེས་པ་སྐད་སྙན་པའི་གང་བ་དག་ཡོད་དོ།། རི་དེ་ལ་འཇིག་རྟེན་སྐྱོངས་བ་འཕགས་སྐྱེས་པོ་དུས་དུས་སུ་དགའ་ཞིང་བརྩེ་བར་བྱེད་པ་ཡིན་ཏེ། ལྷ་མིན་གྱི་ལང་ཚོ་མ་དག་དང༌། གདུག་ཅིང་གཏུམ་པའི་ཀླུ་རྣམས་ཀྱི་བུ་མོ་སྡུག་གུ་སྟོང་སྙེད་ཀྱིས་མཆོད་པར་བྱེད་དོ།། དེའི་འཁོར་དུ་གཏོགས་པའི་ཡི་དྭགས་མཐུ་ཆེ་ཞིང༌། སྡུག་བསྔལ་ཆེ་བ་མང་བོ་དག་ཅིང་ཡོད་དེ། དེར་སྒྲུབ་པ་པོ་ཅི་སྟེ་འབྱོར་བར་གྱུར་ན་ནི། རྩ་་མདང་འབྲས་བུ་རྣམས་དང་ན་རི་ཀོ་ལོའི་འབྲས་བུ་རྣམས་དང༌། ཤ་དང་ཉ་ཤ་དག་གི་གཏོར་མ་རྣམ་པ་སྣ་ཚོགས་པ་དག་བྱའོ།། ཅི་སྟེ་འབྱོར་བ་མ་གྱུར་ན་ཐམས་ཅད་ཡིད་ཀྱིས་བྱའོ།། དེ་ལ་སྔགས་ནི་འདི་ཡིན་ཏེ།ཨོཾ་བི་བི་བི་བི་བི་རུ་དྷ་ཀ་ ས་པཱ་རི་ཝ་རེ་བྷཿ ཁུ་ནི་ཁུ་ནི་པྲ་ཏོ་ཏ་ཀྵི་པ་ཏ་ཨི་མ་མ་བ་ལི་གྲྀའཧཎ་གྲྀའཧཎ་ས་མ་ཡ་མུ་སྨ་ར་ཧཱུཾ་ཧཱུཾ་ཕཊ་ཕཊ་སྭཱ་ཧཱ་དེ་བཞིན་དུ་སྤོས་དཀར་དང་ཐང་ཆུ་དང་ཤའི་བདུག་པ་དག་ཀྱང་སྦྱིན་པར་བྱའོ།། དེ་ནས་ནི་དེས་སྲུང་བ་བྱེད་དེ་མི་འམ་ཅི་དང༌། ལྷ་མིན་དང༌། སྲིན་པོ་དང༌། ཡི་དྭགས་དང༌། ཤ་ཟ་དང༌། མཁའ་འགྲོ་མ་རྣམསཀྱིས་གནོད་པས་མི་ཚུགས་པར་འགྱུར་རོ།། འགའ་ཞིག་རྣམ་ཐར་གསུམ་གནས་གཞན་ནི་བརྩེ་བའི་བདག་ཉིད་དཔའ་བོ་དང༌། བྱིན་རློབ་རིམ་པ་ཕན་ཚུན་རྒྱུ་དང་འབྲས་བུས་མཁས་པས་རིག་པར་བྱ། འདོད་བས་དཔུང་འཇོམས་དེ་ལས་དག་པའི་ལམ་སྟེ་གྲུབ་པ་རྗེས་སུ་འཇུག མུན་པ་ཉམས་དང་དགའ་བའི་རྒྱུ་ལས་རབ་བདེ་ཅིས་ཕྱིར་ཐོབ་མ་ཡིན། དེ་ནས་སྒྲུབ་པ་པོ་བྱང་ཕྱོགས་སུ་སོང་ན། མི་རིང་བ་ན་མེ་ན་ཀོ་ཞེས་པའི་རི་བོ་ཆེན་པོ་ཡོད་དེ། དེ་ནི་ཙམ་པ་ཀ་དང་ཀརྐོ་ལ་དང༌། མ་ར་ཀ་དང༌། ཀེ་རུ་ཀ་དང༌། ཀིམྦ་ཀ་དང༌། ནཱ་ག་སུཥ་པ་དང༌། ཙནྡན་ས་མཆོག་རྣམས་ཀྱི་ནགས་ཀྱིས་བསྐོར་བ། རིའི་དེ་ཁྲོད་ན་སྲིན་མོའི་བུ་མོ་རྟའི་གདོང་པ་ཅན། ལྷ་མིན་མོ་དག་དང༌། ཀླུ་ཕྲན་གྱི་དག་གར་དང་དབྱངས་དང་རོལ་མོ་སྣ་ཚོགས་བས་རྟག་ཏུ་རྩེ་བར་བྱེད་པ་དག་ཡིན། དེར་སྒྲུབ་པ་པོ་བུད་མེད་དེ་དག་ལ་ཆགས་པར་ཡང་མི་བྱ་གླུ་དང་རོལ་མོ་དག་ལ་ཡང་དགའ་བར་མི་བྱའོ། གཞན་དུ་ན་བསོད་སྙོམས་དག་བླངས་ཏེ་འགྲོ་བར་བྱའོ།།

          དེའི་ཕ་རོལ་ན་ཆུ་བོ་ཆེན་པོ་ཤར་ནས་ནུབ་ཏུ་འབབ་ཅིང༌། རྦ་ཀློང་འཁྲུགས་པ་ཤིན་ཏུ་བགྲོད་དཀའ་བ་ཡིན་ཏེ། ཆུ་ཀླུང་དེའི་མིང་ནི་ས་ཏྭ་ལོ་ཏ་ན་ཞེས་བྱའོ།། དེ་ལ་ནི་ཉ་རྣམས་ཁ་དོག་སྣ་ཚོགས་པ་དང༌།གདོང་རྣམ་པ་སྣ་ཚོགས་པ་དག་ཡོད་དེ། སྟག་དང༌། སེང་གེ་དང༌། གུང་དང༌། བ་ལང་དང༌། སྤྲེའུ་དང༌། ནེ་ཙོ་དང༌། ཁ་དང༌། མིའི་གདོང་པ་ལ་སོགས་པའོ།། ཆུ་ཀླུང་དེའི་སྐབས་འགའ་ན་ནི། རྡོ་ལས་སྐྱེས་པའི་ན྄་གྲོ་རྡའི་སྡོང་པོ་ཡལ་གས་ཕན་ཚུན་གྱི་འགྲམ་དུ་ཁྱབ་པ་དག་ཡོད་དེ། ཤིང་དེ་ལ་བརྟེན་ནས་སྒྲུབ་པ་པོ་འགྲོ་བར་བྱའོ།། ཡང་ན་ནི་ཉའི་སྟོབས་ཀྱིས་འགྲོ་བར་བྱ་སྟེ། ཕྱོགས་དེ་དང་ཉེ་བ་ན། ལོ་ཧི་ཏ་ཞེས་བྱ་བའི་རི་དམར་པོ་ཆུང་ངུ་མང་པོ་དག་ཡོད་དེ། དེ་དག་ལ་ནི་སཱ་ལི་དམར་པོ་དང༌། མུད་ག་དང༌། མན་རུ་བ་དག་མ་རྨོས་བར་སྐྱེ་བ་ཡིན་སྟེ། དེ་ལ་བླངས་ནས་ཟན་དུ་བཙོས་ཏེ་ཕྱོགས་སུ་ཤིང་ལས་སྦྲང་རྩི་མང་པོ་ལྟུང་ཡང་བླངས་ཤིང༌། དེ་དག་བསྲེས་སྟེ་ནམ་མཁའི་མཛོད་ཅེས་བྱ་བ་འཕགས་པའི་སྔགས་ཀྱིས་ཡང་དག་པར་སྤེལ་ཞིང་སྦྱངས་ལ་སྔགས་འདིའི་ཉའི་ཚོགས་རྣམས་ལ་གཏོར་མར་སྦྱིན་ནོ།། ཨོཾ་མཾ་མཾ་མཾ་མཾ་མཾ་མ་ཏ་ས྄་རཱ་ཛ། མ་ཏ་ས྄་ག་ཎ་ས་ཧི་ཧ་བྷུཉ྄ཛ་ཧོ་བྷཀྵ་ཧོ། སརྦ་མཧཱ་ས྄དེ་ཝ་ཏ་ཨི་མམ་བ་ལིཾ་གྲྀའཧཎ་གྲྀའཧཎ་ཀ་ར་ཀ་ར། ཀི་རི་ཀི་རི་ཀུ་རུ་ཀུ་རུ་མ་ར་མ་ར་མི་རི་མི་རི་མུ་རུ་མུ་རུ། མ་མ་ཀཏཾ་སཱ་དྷ་ཡ། སརྦ་བུདྡྷ་ཨཱཛྙ་པ་ཡ་ཏི་སྭཱ་ཧཱ། དེ་ལྟར་ལན་ལྔ་བརྒྱར་གཏོར་མ་སྦྱིན་ཞིང༌། འདོད་པའི་ལྷ་ལ་གསོལ་བ་གདབ་པར་བྱའོ།། དེར་ཉ་རྣམས་ཀྱི་རྒྱལ་བོ་སྒྲུབ་པ་པོའི་མདུན་དུ་འོང་བ་ལ། སྒྲུབ་པ་པོའི་སྨྲས་པ། ཀྱཻ་ཉའི་རྒྱལ་པོ། སེམས་ཅན་ཐམས་ཅད་ལ་ཕན་པའི་དོན་དུ་ཁོ་བོ་ནི་གྲོང་ཁྱེར་ཀ་ལཱ་པར་འགྲོ་ཡི། ཆུ་བོའི་ཕ་རོལ་ཏུ་བསྒྲལ་བར་མཛོད་ཅིག གནས་འདི་ལ་ནི་དེ་བཞིན་གཤེགས་པ་རྣམས་དབང་བའོ་ཞེས་བརྗོད་པར་བྱའོ།། དེ་ནས་ཉའི་རྒྱལ་བོ་དེས་སྒྲུབ་པ་པོ་རྒྱབ་ཏུ་ཁུར་ནས་ཆུ་བོའི་ཕ་རོལ་ཏུ་འགྲོ་བར་འགྱུར་རོ།།

          ཀ་ཀ་རིའི་གངས་ཀྱི་བྱང་ཕྱོགས་ནས་ཆུ་བོ་འདིའི་བར་གྱི་ལམ་གང་ཡིན་པ་དེ་དག་ནི། མིའི་འགྲོ་བ་གནས་པ་མེད་དོ།། གང་མི་མ་ཡིན་པའི་འགྲོ་བ་དང༌། གནོད་སྦྱིན་གཏུམ་པོ་མི་བཟད་པ་དག་གནས་པ་ཡིན་ནོ།། འོན་ཀྱང་ལམ་འདི་དག་གི་ཤར་དང་ནུབ་ཏུ་དཔག་ཚད་ལྔ་བརྒྱས་བཅད་པའི་ཕ་རོལ་ན་ནི། གྲོང་དང་གྲོང་ཁྱེར་དང་གྲོང་བརྡལ་དག་ཀྱང་ཡོད་མོད་ཀྱི་ལམ་དེ་དག་ནས་སོང་ན་ནི་ལོ་བརྒྱ་ཕྲག་གིས་ཀྱང་གྲོང་ཁྱེར་ཀ་ལ་བར་ཕྱིན་པར་མི་འགྱུར་ཏེ་ཀུན་ཏུ་འཁོད་པར་འགྱུར་རོ།། ཆུ་ཀླུང་སཱི་ཏའི་བྱང་ཕྱོགས་དེའི་བར་མཚམས་ཐམས་ཅད་ནི་རི་ཁ་བ་ཅན་མང་བོས་ཀུན་ཏུ་གང་བ་ཡིན་ནོ།། འོན་ཀྱང་གངས་ཀྱི་རི་བར་བཅད་པ་ནི་མེད་དོ།། དེ་ནས་ཆུ་ཀླུང་དེ་ཡོངས་སུ་བརྒལ་བའི་བྱང་ཕྱོགས་ན་ནི། འཛམ་བུའི་གླིང་གི་བྱང་ཕྱོགས་ཀྱི་གྲོང་ཁྱེར་རྣམས་ཡོད་དེ། ཡུལ་དང་གྲོང་དང་གྲོང་ཁྱེར་དང་གྲོང་བརྡལ་དག་གིས་གང་བ། རབ་ཏུ་འབྱོར་བ་དང་བདེ་བ་དང་ལོ་ལེགས་པ་ཡིན་ནོ།། གང་ལ་སྙིང་རྗེའི་བདག་པོ་ནི། །མིག་གསུམ་གཟུགས་ཀྱིས་གནས་པ་སྟེ། །དེ་ཡིས་གནས་ཀྱིས་མཚན་པས་ན། །ཤམ་བྷ་ལ་ཞེས་རབ་ཏུ་གྲགས། །སེང་གེས་མཚན་པའི་རྒྱལ་མཚན་ནི། །སེང་གེའི་རྒྱལ་མཚན་རབ་གྲགས་ལྟར། །གང་ལ་ཤམ་བྷ་ལས་མཚན་པ། །ཤམ་བྷའི་ཡུལ་ཞེས་དེ་ལ་བརྗོད། །གང་ལ་ཀླ་ཀློ་མེད་པ་དང༌། །བདེན་སྨྲ་བརྫུན་པ་མ་ཡིན་དང༌། །མུན་པའི་སྟོབས་ནི་ཉམས་གྱུར་ལ། །སྙིང་སྟོབས་ཡོན་ཏན་རྒྱས་པ་ཡིན། །ཆུ་བོ་དེ་དང་ཀེ་ལ་ཤའི། །བར་གྱི་ཡུལ་ནི་རྣམ་པ་མང་པོ་སྟེ། །ཉ་ཞེས་བྱ་བའི་ཡུལ་དཔག་ཚད་ཉི་ཤུའོ།། སུ་མིན་ཏོ་ཞེས་བྱ་བ་དཔག་ཚད་ཉི་ཤུའོ།། བྷ་ཊ་ས྄ེན་ཞེས་བྱ་བ་དཔག་ཚད་བརྒྱའོ།། ཙཱི་ན་ཞེས་བྱ་བ་དཔག་ཚད་སྟོང་སྟེ། དབུས་ཀྱི་ཆ་ལའོ།། བར་དོ་ཞེས་བྱ་བ་དཔག་ཚད་བརྒྱའོ།། ཀུ་རུ་ཞེས་བྱ་བ་དཔག་ཚད་བརྒྱའོ།། བྷ་དྲ་ཀ་ཞེས་བྱ་བ་དཔག་ཚད་ལྔ་བཅུའོ།། དེ་དག་གི་ཕ་རོལ་ན། གན་དྷ་ར་ཞེས་བྱ་བ་དཔག་ཚད་ཉི་ཤུའོ།། ཀ་ཤ་ཞེས་བྱ་བ་དཔག་ཚད་ཉི་ཤུའོ།། བྷ་དྲ་ཞེས་བྱ་བ་དཔག་ཚད་ཉིས་བརྒྱའོ།། མ་ཧཱ་ཙི་ན་ཞེས་བྱ་བ་དཔག་ཚད་སྟོང་སྟེ་དབུས་ཀྱི་ཆ་ལའོ།། རྡ་ར་རྡོ་རྗེ་ཞེས་བྱ་བ་དཔག་ཚད་བརྒྱ་སྟེ་རིའི་ངོས་ལ་གནས་པའོ།། བྲྀའ་ཀི་ཀ་ཞེས་བྱ་བ་དཔག་ཚད་ཉིས་བརྒྱའོ།། དེ་དག་གི་ཡང་ཕ་རོལ་ན། མ་ཧི་ཥ་ཀ་ཞེས་བྱ་བ་དཔག་ཚད་ཉིའས་བརྒྱའོ།། མ་ཧི་ལ་ཀོ་ཞེས་བྱ་བ་དཔག་ཚད་སྟོང་སྟེ་དབུས་ཀྱི་ཆ་ལའོ།། བརྣ་ར་ཞེས་བྱ་བ་དཔག་ཚད་ཉིས་བརྒྱའོ།། སུ་ཏཱ་ཕ་ལ་ཞེས་བྱ་བ་དཔག་ཚད་ལྔ་བརྒྱའོ།། དེ་དག་གི་ཕ་རོལ་ན། ཀ་ཊུ་ཀ་ཞེས་བྱ་བ་དཔག་ཚད་ལྔ་བཅུའོ།། ཁཱ་ར་ཞེས་བྱ་བ་དཔག་ཚད་ལྔ་སྟེ་དབུས་ཀྱི་ཆ་ལའོ།། ཀོམྤ་ཛི་ཞེས་བྱ་བ་དཔག་ཚད་བརྒྱའོ།། དེ་དག་གི་ཤར་དང་ནུབ་ཀྱི་ཆར་དག་ལ་ཡང༌། ཡུལ་འཁོར་དང་གྲོང་ཁྱེར་གཞན་དག་ཀྱང་ཡོད་དོ།། དེ་དག་ཆུ་ནི་མང་པོ་དང༌། །མཚོ་དང་མཚོ་བྲན་དུ་མས་བརྒྱན། །གངས་ཀྱི་རི་དང་རི་བོ་བཟང༌། །སྨན་ལྗོངས་ཉམས་དགའ་དུ་མ་དང༌། །ནགས་དང་ཀུན་དགའ་ཡིད་འོང་དང༌། །སྨན་རྣམས་དག་གི་གང་བ་ཡིན། །རྒྱལ་པོའི་ཕོ་བྲང་སྣ་ཚོགས་དང༌། །ཚོང་འདུས་དང་ནི་ཚོང་ཁང་དང༌། །ཟངས་རྣམས་རྣམ་པ་སྣ་ཚོགས་དང༌། །ཡོ་བྱད་རབ་ཏུ་རྒྱས་པ་ཡོད། །དེ་ན་འཇིགས་པ་འགའ་ཡང་མེད། །ཉམ་ངར་གྱུར་བ་ཡོད་མ་ཡིན། །འོན་ཀྱང་དེ་ལ་མི་བལྟ་སྟེ། །སྲེད་པས་སྒྲུབ་པོའི་གེགས་བྱེད་དོ།། །གྲོང་ཁྱེར་མཆོག་ནི་ཀ་ལཱ་པ། །འབའ་ཞིག་བསམ་ཏེ་འགྲོ་བར་བྱ། །རྒྱ་ཡུལ་རྒྱ་ཡུལ་ཆེན་པོ་དང༌། །བ་ཡི་ལ་ཀོ་ཁ་ར་རྣམས། །བྱང་ནས་བྱང་དུ་བགྲོད་བྱ་སྟེ། །ལམ་སྟེ་ཤིན་ཏུ་རིང་བ་ཡིན། །སྟོང་ཕྲག་མང་པོ་དེ་དག་ཀྱང༌། །སྔགས་ཀྱི་ཤུགས་འཆང་དེ་ཡིས་ནི། །ཞག་བདུན་ཟླ་བ་ཕྱེད་ལ་སོགས། །ཟླ་དྲུག་ལས་གཞན་ལྷག་པས་མིན། །དེ་རྣམས་ལས་ཀྱང་རབ་བརྒལ་ན། །འབྱུང་ཁུངས་རྣམ་པ་སྣ་ཚོགས་ཡོད། །ཁ་ཅིག་ལ་ནི་དུག་གི་རྒྱུན། །ཁྱད་པར་ཁྱད་པར་ལྡན་པ་འབབ། །གསེར་གྱི་རྡུལ་བརྩེགས་རི་བོ་དང༌། །དེ་བཞིན་དངུལ་དང་ཟངས་ཀྱི་སྟེ། །ཁ་ཅིག་ལྕགས་དང་ཨ་བྷ྄ར་དང༌། །རང་ག་བྷང་ག་དེ་བཞིན་ནོ། །དེ་དག་ས་འདི་འཐུག་པོ་དང༌། །ཁ་ཅིག་ལ་ནི་དུག་གི་རྒྱུན། །བྱེ་མ་རྡོ་བས་གཡོགས་པ་ཡིན། །གསེག་མ་རྣམ་པ་སྣ་ཚོགས་དག །ཁ་ཅིག་རིན་ཆེན་དུ་མས་ཁྱབ། །ཡུལ་དེ་དག་གི་ས་ཕྱོགས་ན། །རྩ་དང་ལྗོན་ཤིང་རྣམ་པར་སྤངས། །ནོར་བུ་ཛི་བནྟི་དང་ནི། །བྱུ་རུ་རྣམ་པ་དུ་མ་སྐྱེས། །གསེར་ལས་འཆི་བར་བྱེད་པའི་ཆུ། །སྨྱོ་བར་བྱེད་པ་དངུལ་ལས་ཏེ། །གཞན་ནི་སྤྲུ་དང་ལྤགས་པ་ལྟུང༌། །ཁ་ཅིག་དུ་མའི་ནད་རྣམས་སོ།། འབྱུང་ཁུངས་དག་ནས་དཔག་ཚད་གསུམ། །འདས་ནི་དྲི་བྲལ་ཆུ་ཉིད་དེ། སྒྲུབ་པོ་སྔགས་ཀྱིས་མཐུ་ཡིས་ནི། །དེ་ཀུན་ཡོན་ཏན་བྱེད་པ་ཡིན། །གསེར་གྱི་ཚེ་ནི་རིང་པོ་སྟེ། །དངུལ་གྱི་དེ་བཞིན་མདངས་བཟང་བ། །ལྷག་མ་གང་རྣམས་དེ་རྣམས་ཀྱི། །ནད་ཀུན་འཇིག་པར་བྱེད་པ་ཡིན། །ཡང་དག་བརྒལ་བའི་ཕ་རོལ་ན། །རིག་ལྔ་པ་ཞེས་བྱ་བ་རིན་པོ་ཆེ་དུ་མས་བརྒྱན་པ། ཤིང་ཨརྡ་དང༌། སལ་ཝ་ལ། ཤལ་མ་ལི་དང༌། སཱ་ལ་དང༌། ཏ་མ་ལ་དང༌། ད་ཤཱ་མ་དང༌། ནི་ཥ྄་ཀ་ར་དང༌། ཨ་མྲ་དང༌། ཀ་ར་བཱི་ར་དང༌། ཤིང་ལིན་དང༌། བ་ཀུ་ལི་དང༌། གན་དྷ་མོ་ད་ཧ་དང༌། མོ་ད་རྡ་མ་ལ་སོགས་པ་ལྗོན་ཤིང་རིགས་བརྒྱ་ཕྲག་དུ་མས་གང་བ་ཡིན་ནོ།། རི་དེ་ལ་ནི་མི་འམ་ཅི་དང༌། མི་འམ་མོ་དག་འདོད་པའི་ཡོན་ཏན་སྣ་ཚོགས་ཀྱི་བརྩེ་བར་བྱེད་ཅིང༌། རྟག་ཏུ་དགའ་བའི་གནས་པ་ཡིན་ནོ།།

          དེ་རྣམས་ཀྱི་སྒྲུབ་པ་པོ་ལ་འདྲིད་པར་བྱེད་པའི་ཕྱིར། རབ་ཏུ་སྙན་པའི་གླུ་དང་རོལ་མོ་བྱེད་པ་དག་ཀྱང་ཡོད་དོ།། བསྡིག་པའི་ཕྱིར་འཇིགས་པའི་སྒྲ་འབྱིན་པའམ་གཟུགས་སྣ་ཚོགས་སུ་བསྒྱུར་བ་དག་ཀྱང་ཡོད། རབ་ཏུ་སྐྱོ་བའི་ཕྱིར། དུད་མོ་ལ་སོགས་པ་སྣ་ཚོགས་པ་སྦྱོར་བར་བྱེད་དོ།། དེ་དག་ལ་སྒྲུབ་པ་པོ་ཆགས་པར་མི་བྱ། འཇིགས་པར་མི་བྱ། སྐྱོ་བར་མི་བྱ་སྟེ། གཞན་དུ་ན་སྟོང་པ་ཉིད་ཀྱི་གནས་བས་ཟིལ་གྱིས་མནན་ཏེ་འགྲོ་བར་བྱའོ།། གལ་ཏེ་རྣམ་པ་དེ་ལྟ་བུ་ལས་གཞན་བས་འགྲོ་བ་ནི། སྒྲུབ་པ་པོ་ལ་སྡུག་བསྔལ་ཆེན་པོ་སྟེར་རོ།། དེ་ནས་རི་བོ་དེ་ཡང་འདས་པ་ན་བྷོ་ཊ་དང༌། སུ་ཏ་བྷོ་ཊ་དང༌། པྲ་བྷོ་ཊ་ཞེས་བྱ་བའི་ཡུལ་ཆུང་ངུ་དག་ཡོད་དེ། དེ་དག་ན་ནི་རྡོ་རྗེ་མཁའ་འགྲོ་མ་དག་མིའི་བུ་མོ་རྫུ་འཕྲུལ་ཅན་གྱི་རྣམ་པར་གནས་སོ།། དེར་སྒྲུབ་པ་པོས་ཞག་བདུན་དུ་གནས་པར་བྱ་ཞིང༌། གསོལ་བ་གདབ་པར་བྱའོ།། དེ་ནས་དེ་རྣམས་ཀྱིས་སྨྲས་པ། ཀྱཻ་སྒྲུབ་པ་པོ་ཁྱོད་ལ་ཅི་ཞིག་དགོས། སྒྲུབ་པ་པོས་སྨྲས་པ། བདག་གྲོང་ཁྱེར་ཀ་ལཱ་པར་མྱུར་དུ་བགྲོད་པར་མཛོད་ཅིག དེ་ནས་མི་མོ་རྫུ་འཕྲུལ་དང་ལྡན་པ་གཅིག་གིས་སྒྲུབ་པ་པོ་ཕྲག་པ་ལ་ཐོགས་ཏེ་དཔག་ཚད་བཞི་ཡི་མཐོ་བའི་གངས་ཀྱི་རི་བོ་ཆེན་པོདང༌། གངས་ཁྲོད་ཀྱི་ལམ་དཔག་ཚད་བརྒྱ་ཕྲག་ལྷག་པ་ཡང༌། ཆུ་ཚོད་གཅིག་གིས་མངོན་པར་བགྲོད་ནས། རི་བོ་ཙན་དྲ་ཀ་ལ་ཞེས་བྱ་བ་ཤིང་ཧིན་ཏ་ལ་དང༌། མ་ཏ་ལ་དང༌། ཀོ་ལ་ཀ་དང༌། སན་དྷུ་ཝ་ར་ར་དང༌། མ་གུ་ལ་དང༌། དྭན་དྲ་དང༌། སོ་མ་ཝར་དྷ་དང༌། ས་མ་ན་དང༌། ནི་ཙུ་ལད་དང༌། བི་དུརྨ་དང༌། ཏིན་ཏུ་ལ་སོགས་པས་ཡོངས་སུ་གང་བ། སྨན་ལྗོན་ཤིན་ཏུ་ཉམས་དགའ་བ་དང་བཅས་པ་དེར་ཕྱིན་པར་འགྱུར་རོ།། སྒེག་པའི་གཟུགས་ལའང་དགའ་མིན་ཏེ། །ཆ་བྱད་འཇིགས་པའང་དེ་བཞིན་ནོ། །རྡོ་རྗེ་མིག་དང་ལྡན་དེ་དག །དགེ་བར་སྤྱོད་ལ་དགེས་པར་གྲགས། །དེ་དང་སྡིག་ལྡན་རྣམས་ལ་ཡང༌། །སྙིང་རྗེ་ལྡན་རྣམས་མཉམ་པར་བྱམས། །སྒྲུབ་པོ་རང་ཉིད་སྡིག་པ་ནི། །ཟད་པའི་བདེ་བ་སྣང་བ་ཡིན། །རི་བོ་དེ་ནི་ཤམ་བྷ་ལའི་ཡུལ་མཐའ་ཡིན་ཏེ། ཕྱོགས་ཏེ་འཕགས་པ་བྷིར་ཀུ་ཊི་ཐོར་ཚུགས་གཅིག་མ་བཞུགས་སོ།། དེ་ལ་མེ་ཏོག་ཀུན་རྡ་དང་ཀུ་སུ་མ྄བྷའི་མེ་ཏོག་གིས་སྦྱིན་བསྲེག་སྟོང་ཕྲག་བརྒྱད་འབུལ་ནས། དངོས་གྲུབ་ཀྱི་དོན་དུ་གསོལ་བ་བཏབ་སྟེ་འགྲོ་བར་བྱའོ།། དེ་ལས་གངས་ཀྱི་པུཎ་ཌརཱི་ཀ་གཅིག་དག་བླངས་སྟེ། ཨོཾ་ཤྭེ་ཏ་ཤྭེ་ཏ་ཛཱ་ཊི་ནི་ཤུ་ཏི་སྨི་ཏི་བི་ཛ་ཡེ་བྷཾ་སྭཱ་ཧཱ། ཞེས་པའི་རིག་པ་ལྔ་སྟོང་དུ་བཟླས་ནས་སྤྱི་བོར་བཅིངས་བ་ཙམ་གྱིས་གནོད་སྦྱིན་གཏུམ་པོ་མཐའ་དག་དབང་དུ་བྱེད་པ་དང༌། ཐམས་ཅད་ལ་འཇུག་པའི་ཤེས་རབ་ཐོགས་པ་མེད་པར་སྐྱེ་བར་འགྱུར་རོ།། དེ་ནས་བྱང་ཕྱོགས་སུ་སོང་སྟེ། མེ་གྷ་ཀེ་ཏུ་ཞེས་བྱ་བའི་ཡུལ་ལོ།། བི་བི་ཛ་ལ་ཞེས་བྱ་བ། ཁ་དི་ར་དང༌། ཙནྡན་གྱི་ནགས་ཆེན་པོ་དག་ཡོད་དེ། དེ་ཡང་བགྲོད་པར་བྱ་བ་དཔག་ཚད་བརྒྱ་བ་ཡིན་ནོ།། དེའི་ཕ་རོལ་ཏུ་ལྗོན་ཆེན་པོ་སམ་སུ་ཁ་ཞེས་བྱ་བ་ཡོད་དེ། གང་འཛམ་བུའི་གླིང་ན་ཡོད་པའི་ཤིང་གིས་རིགས་གང་ཡིན་པ་དེ་ཐམས་ཅད་ཡུལ་དེ་ན་ཡོད་དེ། མ་ལུས་ཤིང་ལུས་པ་མེད་པས་བརྒྱན་པའོ།། དེའི་ཕ་རོལ་ན་ཀུན་ཏུ་དགའ་ཞེས་པའི་ནགས་ཡོད་དེ། དེ་ཡང་འདས་པའི་ཕ་རོལ་ན་གྲོང་ཁྱེར་ཀ་ལཱ་པ་ཡོད་དེ་དེར་སྒྲུབ་པ་པོ་བྱང་ཆུབ་སེམས་དཔའ་སེམས་དཔའ་ཆེན་པོ་མི་བདག་གི་རྣམ་པ་འཛིན་པ་དེ་ལས་ཆོས་ཉན་པ་ཐོབ་པར་བྱ་བའི་ཕྱིར། ཕོ་བྲང་ཆེན་པོ་ཀ་ལཱ་པ་དེའི་ཕྱོགས་བཞི་ཀུན་ནས་ཕྱག་འཚལ་བར་བྱ། བདུག་སྤོས་ཀྱང་བཏུལ་བར་བྱ། མེ་ཏོག་དག་ཀྱང་གཏོར་བར་བྱ་སྟེ། བསྐོར་བ་དག་ཀྱང་བྱ་སྟེ། ཡང་ན་ནི་ཞག་གཅིག ཡང་ན་ནི་ཞག་བདུན། ཡང་ན་ནི་ཟླ་བ་ཕྱེད། ཡང་ན་ནི་ཟླ་བ་གཅིག་གོ།

          དེ་ལྟར་སྒྲུབ་པ་པོས་ཉིད་ཀྱི་ཇི་ལྟར་སྡིག་པ་མི་ཟད་པར་འགྱུར་པ་དེ་ལྟ་དེ་ལྟར་མི་བདག་བྱང་ཆུབ་སེམས་དཔའི་བཀའ་ཡིས་གནང་བ་སྦྱིན་ཏེ། གང་གི་ཞབས་ཀྱི་པདྨོའི་དྲུང་དུ་འཁྲིད་པར་བྱེད་དོ༑༑ གང་གི་ཚེ་སེམས་དཔའ་ཆེན་པོ་མཐོང་བ་དེའི་ཚེ། སེམས་ཤིན་ཏུ་མཉམ་པར་བཞག་པ་དང༌། གཡོ་བ་མེད་པ་དང༌། དང་བའི་སེམས་ཀྱིས་དབྱུག་པ་འགྱེལ་བ་ལྟ་བུའི་ཡན་ལག་བརྒྱད་དང་ལྡན་པས་རབ་ཏུ་འདུད་པས་ལན་བརྒྱ་སྟོང་དུ་མར་ཕྱག་བྱའོ།། རིན་པོ་ཆེའི་མེ་ཏོག་དག་ཅིང་གཏོར་བར་བྱའོ།། གལ་ཏེ་སྒྲིབ་པ་ཤེས་ཆུང་བ་ཞིག་ཡིན་ན་ནི། དེའི་ཞབས་ལ་མགོ་བོས་གཏུག་པ་ཙམ་གྱིས་འདོད་པའི་དངོས་གྲུབ་ཐོབ་པར་གྱུར་རོ།། རྣམ་པ་གཞན་ནི་བྱང་ཆུབ་སེམས་དཔའ་དེའི་བཀའ་ལསའདོད་པའི་དངོས་གྲུབ་ཏུ་འགྱུར་ལ། དེ་བཞིན་དུ་གཞན་ཡང་དངོས་གྲུབ་ཕྲ་མོ་དག་དང༌། ཤེས་པ་དག་ཀྱང་ཐོབ་པར་འགྱུར་རོ།། ཅི་སྟེ་འཛམ་བུའི་གླིང་གི་ལྷོ་ཕྱོགས་སུ་སྐྱེ་བོ་མང་པོ་ལ་ཕན་པ་དང་བདེ་བའི་དོན་དུ་ངེས་པར་བསམ་པ་ཡིན་ན་ནི། དེའི་ཐབས་གང་ཡིན་པ་དེ་ཡང་འབྲི་བར་བྱ་ཞིང༌། དེས་ཅི་སྐད་བསྟན་པ་དེ་བཞིན་དུ་སྒྲུབ་ན་དེ་ཁོ་ན་བཞིན་འགྲུབ་པར་འགྱུར་རོ།།

          དེ་ནས་སྒྲུབ་པ་པོས་ཡུལ་གྱི་མཆོག་དང་མཆོག་དེ་དག་བལྟ་བར་བྱ། དེ་བཞིན་གཤེགས་པས་གསུངས་པའི་གླེགས་བམ་དག་ཅིང་མངོན་དུ་བྱ། གཅུག་ལག་ཁང་རྣམ་པ་སྣ་ཚོགས་པ་དང༌། མཆོད་རྟེན་སྣམ་པ་དུ་མ་དེ་དག་ལ་ཕྱག་འཚལ་བར་བྱ། སྨོན་ལམ་ཀྱང་གདབ་པར་བྱའོ།། ཡུལ་དེ་ཟླུམ་པོར་མཉམ་པ་སྟེ། །གངས་དང་ལྡན་པས་བསྐོར་བ་ཡིན། །འབྱུང་བོ་ཡི་ནི་ཕྱོགས་ཆ་ན། །དཔག་ཚད་ལྔ་བཅུར་འཕགས་པ་ནི། །མཆོག་དང་གྲགས་པ་རབ་ལྡན་པ། །འབྱུང་པོའི་དབང་པོ་མགྲིན་སྔོན་གྱིས། །རྟག་ཏུ་བརྟེན་ཅིང་དགེ་བའི་ས། །རི་དབང་ཀེ་ལ་ཤ་ཞེས་བྱའོ།། སྣ་ཚོགས་རིག་པ་སྨན་གྱི་ལས། །སྒྱུ་རྩལ་དབྱེ་བ་གཞན་དང་གཞན། །བཟོ་རྣམས་དུ་མ་མཐའ་ཡས་པ། །ཉིན་དང་ཉིན་ལ་རྟག་ཏུ་སྤྱོད། །ཕོ་བྲང་མཆོག་ནི་ཀ་ལཱ་པ། །རིན་ཆེན་སྣ་ཚོགས་ལས་གྲུབ་ཅིང༌། །གྲུ་བཞི་ལྷམ་བའི་གཞི་ལ་གནས། །ལྷ་ཡི་བཟོ་བོས་བྱས་པ་སྟེ། །གྲོང་ཁྱེར་དེ་ཡི་གཡས་ངོས་ན། །ཙནྡན་ཨ་དཀར་ནགས་ཀྱིས་ཁྱབ། །དྭངས་ཤིང་གསལ་ལ་ཡིད་འོང་བའི། །ཡིད་ཀྱི་མཚོ་དག་ཡོད་པ་ཡིན། །གང་གི་ཡུལ་དེའི་དབུས་ན་ནི། །དེ་བཤད་དེ་དག་གནས་པའོ།། །ནགས་རྣམས་དང་ནི་ལྗོངས་དག་གི་ །ཕྲེང་བ་རིམ་པ་གསུམ་གྱིས་མཛེས། །གྲོང་བརྡལ་ཉི་ཤུ་རྩ་བརྒྱད་དང༌། །ཡུལ་ཕྲན་དུ་མས་རྣམ་པར་བརྒྱན། །ཕྱོགས་མཚམས་ཀྱི་ནི་ལམ་དག་ན། །རྩེ་མོ་བརྒྱ་དང་བརྩེགས་པ་ཡང༌། །དེ་རྣམས་ལ་ནི་གོ་བགོས་པའི། །སྲུང་བ་པོ་ནི་འབུམ་ཕྲག་ཡོད། །གངས་དང་རི་བོ་དེ་དག་ལ། །གླང་ཆེན་སྦོས་ཀྱི་གླང་པོ་དང༌། །ཆེ་བ་དྲུག་པ་མུ་ཏིག་ཅན། །ནགས་ཚལ་རི་དྭགས་དུ་མས་མཛེས། །གདོང་ལྔ་བ་དང་རྐང་བརྒྱ་པ། །གླང་པོའི་གདོང་དང་བྱ་ཚོགས་དང༌། །འདབ་ཆགས་སྐྱེས་བུའི་ལུས་ཅན་ཡོད། །དབུས་ལས་རྒྱབ་ཀྱི་ཕྱོགས་ཆ་ན། །རྒྱང་གྲགས་ཚད་ཀྱི་རི་བོ་བཟང༌། །ཚར་དུ་དངར་བ་བཅུར་ཡིན་ཏེ། །བཟང་སྐྱོང་ལྷུན་པོ་རྩེ་འཛིན་དང༌། །ས་ཡི་སྙིང་བོ་གཙུག་ཕུད་འཛིན། །ཧ་ལ་ཧ་ལ་སྒྲོགས་མཛོད་པ། །ལྕང་ལོའི་བདག་པོ་སྐྲ་ཅན་མ། །དོན་དམ་ཡང་དག་འཕགས་དེ་བཞིན། །བཅུ་པ་མ་རྒྱལ་བ་ལས་རྒྱལ། །དེ་དག་རྣམས་ཀྱི་བརྟེན་པ་སྟེ། །བྱེ་བ་ཕྲག་བརྒྱའི་ཆོས་ཀྱི་གནས། །རྟག་ཏུ་བྱང་ཆུབ་སེམས་དཔའ་ནི། །སྟོང་ཕྲག་བཅུ་བཅུས་བརྟེན་པ་ཡིན། །ཀཻ་ལ་ཤ་ཡི་འགྲམ་ངོགས་ན། །མཁའ་ཁམ་རྡོ་རྗེ་ནམ་མཁར་གནས། །སྟོང་ཕྲག་བརྒྱད་ཀྱི་སྨན་རྣམས་དང༌། །མཐུ་ལྡན་སྲོག་ཆགས་དུ་མ་དང༌། །མེ་ཏོག་འབྲས་བུ་ཁྱད་པར་ཀུན། །དེ་ནས་རྟག་ཏུ་སྤྱོད་པ་ཡིན། །མུ་ཏིག་ཟླ་བ་ཆུ་ཤེལ་དང༌། །དམར་པོ་ཨིནྜ་ནཱི་ལ་དང༌། །མར་ཏ་ཀ་དང་གཡས་སུ་འཁྱིལ། །པུཥ་པ་རཱ་ག་བྱུ་རུའི་སྡེ། །ཨདྨ་གར་བྷ་གསེར་ལ་སོགས། །ཁམས་རྣམས་སྣ་ཚོགས་མཐའ་ཡས་ཡོད། །དངུལ་ཆུས་ཁྱད་པར་མང་པོས་གང༌། །པ་རུ་ཤ་ཀ་བཻ་ཌཱུརྱ། །དེ་ན་རྙེད་པར་དཀའ་མིན་ཏེ། །ཁ་ཟས་རོ་བཅུད་སྣ་ཚོགས་པ། །དེ་དག་མི་འབྱུང་གང་ཡང་མེད། །སྣ་ཚོགས་གོས་ཕྱིར་ཁྱད་པར་ནི། །བསམ་པ་ཇི་བཞིན་བགོ་བྱེད་དེ། །དགེ་མིན་ལས་ཀྱི་ལམ་བཅུ་བོ། །རྟག་ཏུ་སྤྱོད་པའི་སྐྱེ་བོ་ཉུང༌། །ཕལ་ཆེར་དགེ་ལ་གནས་པ་ཡིན། །ཐེག་པ་གསུམ་གྱི་ལམ་གནས་པའི། །དྲང་སྲོང་དཔག་ཏུ་མེད་པས་བརྟེན། །ཐམས་ཅད་ལྷ་ཡི་སྐད་དུ་སྨྲ། །དེ་ན་གནས་པའི་མི་རྣམས་ནི། །ཚེ་ནི་ལོ་བརྒྱ་ལས་མི་ཐུང༌། །དུས་མིན་འཆི་བ་ཉུང་བ་ཡིན། །རྟག་ཏུ་འདོད་ལ་དགའ་བར་སྤྱོད། །འོན་ཀྱང་དགེ་བ་ལས་མི་ཉམས། །ཆོས་དང་འདོད་པ་དེ་བཞིན་གཞན། །ནོར་དང་ཐར་བའི་དོན་ཞེས་པ། །རྫོགས་ལྡན་བཞིན་དུ་རབ་སྤྱོད་དེ། །འདི་མཚུངས་གཞན་ནི་ཡོད་མ་ཡིན། །རྒྱལ་བོའི་བུ་ནི་གང་བཙས་པར། །ནོར་བུ་རིན་ཆེན་འོང་འགྱུར་ལ། །ཞག་བདུན་འོད་བཟང་འཕྲོ་གྱུར་པ། །དེ་ནི་བྱང་ཆུབ་སེམས་དཔར་ཤེས། །གང་གི་སྔོན་དུ་མ་མཐོང་བའི། །མེ་ཏོག་རབ་ཏུ་རྒྱས་པ་ཆེ། །ཁྱིམ་དུ་མངོན་པར་སྐྱེས་འགྱུར་བ། །དེ་ནི་ལྷ་ཡི་ཡན་ལག་མའོ། །མི་བདག་ཡན་ལག་མར་བཅས་པ། །རྒས་པ་མེད་ཅིང་ན་མེད་དེ། །འཇམ་པོའི་ཁྲིམས་ཀྱིས་རྟག་ཏུ་འཚོ། །འཁོར་ལོའི་སྒྱུར་དང་མཚུངས་པ་ཡིན། །རྟག་ཏུ་བྱང་ཆུབ་སེམས་དཔའ་དང༌། །དྲང་སྲོང་སྔགས་ཀྱི་སྤྱད་པ་ཅན། །ཡང་དག་རིག་པ་ཉིད་སྟོན་གྱི། །རྟོག་གེའི་བགྲོད་མེད་དེ་མིན་ཙམ། །ལས་རྣམས་རྣམ་པ་སྣ་ཚོགས་དང༌། །གྲུབ་པ་བརྒྱད་ལ་སོགས་རྣམས་དང༌། །གང་གཞན་དངོས་གྲུབ་སྣ་ཚོགས་དག །དེར་ནི་མངོན་གསུམ་རྙེད་དཀའ་མིན། །ཟླ་བ་རེ་རེར་སྒྲུབ་པ་པོ། །འདི་དེ་འདོད་པའི་དངོས་གྲུབ་ཅེས། །ཆོས་ཀྱི་དགའ་བའི་གཏམ་ཆེན་པོས། །རྟག་ཏུ་ངོ་མཚར་དགའ་བ་ཡིན། །ཆགས་གྲལ་བྱེད་དང་དགའ་བ་དང༌། །སྤྱོད་པ་གཅིག་ཏུ་དགེ་བའི་བློས། །དག་པའི་སེམས་ནི་མཉེས་གཤིན་པ། །སྦྱིན་དང་བཟོད་དང་དུལ་བ་དང༌། །མི་འཚེ་བ་དང་རྩེ་གཅིག་དང༌། །རིག་དང་ཤེས་དང་ལེགས་པར་ཐོས། །བསམ་གཏན་བཟླས་དང་མཆོད་དེ་བཞིན། །ཡང་དག་དེ་ཉིད་བསྒོམ་པའོ། །དེ་སྐད་གསུངས་པའི་འདུས་པ་སྟེ། །ཐམས་ཅད་རྗེས་སུ་ཡི་རང་གྱུར། །སྐལ་བཟང་ལྡན་པ་ལྔ་བརྒྱ་པོ། །ཡང་ཡང་འདུད་ཅིང་བསྐོར་བ་བྱས། །དེ་ནས་བརྩེ་ལྡན་འཇིག་རྟེན་མགོན། །རབ་ཏུ་བཞད་ཅིང་ལེགས་སོ་ལེགས། །སྐྱེ་བོ་མང་པོ་གྲོལ་དོན་དུ། །དོན་ཡོད་ལྕགས་ཀྱུས་འདི་བཤད་དོ། །འཁོར་རྣམས་ཀྱིས་ནི་འདི་བཟུང་ནས། །རྟག་ཏུ་བྱང་ཞིང་ཆུབ་པར་ཀྱིས། །བློ་གྲོས་ལྡན་པ་ལྔ་བརྒྱ་པོ། །ཏིང་ངེ་འཛིན་གྱི་ཤུགས་ཐོབ་ནས། །གྲོང་ཁྱེར་དྲུག་ཏུ་ཡུད་ཀྱིས་སོང༌། །ཐེག་ཆེན་ཆོས་ནི་རབ་བཤད་ནས། །རིམ་པའི་ཆོ་ག་འདི་ཉིད་ཀྱིས། །གྲོང་ཁྱེར་ཀ་ལཱ་པར་སོང་ངོ༌། །དེ་ལས་བརྒྱ་ཕྲག་བཞི་རྣམས་ཀྱིས། །འདོད་པའི་དངོས་གྲུབ་ཆེན་པོ་ཐོབ། །གང་མང་རྣམ་པར་མི་རྟོག་པ། །དེ་སོགས་ལྷག་མ་གང་ཡིན་ཏེ། །ཟབ་དང་རྒྱ་ཆེའི་ཚུལ་རྟོགས་ནས། །གྲོང་ཁྱེར་དྲུག་ཏུ་སླར་ཡང་འོང༌། །དོན་ཡོད་ཞག་པའི་མདོ་སྡེ་ནི། །སྟོང་ཕྲག་ལྔ་བཅུ་གཅིག་པ་དང༌། །རིག་པ་མཆོག་གི་འབུམ་སྡེ་སོགས། །གཞན་ཡང་རིག་སྔགས་སྣ་ཚོགས་དང༌། །རལ་བ་གཅིག་མའི་ཆོ་ག་དང༌། །འཇམ་པའི་རྡོ་རྗེས་རྟོགས་པ་ནི། །སྟོང་ཕྲག་ཉི་ཤུ་ལྔ་པ་སྟེ། །ཆོ་ག་དུ་མ་རྒྱས་པར་བྱས། །གང་ཞིག་ཀ་ལཱ་པར་འཇུག་པའི། །ཐབས་འདི་བྲིས་པའི་བསོད་ནམས་ཀྱིས། །འགྲོ་བ་དྲུག་དུ་འཁོར་བ་རྣམས། །འཇམ་པའི་དབྱངས་དང་མཚུངས་གྱུར་ཅིག །

          དཔལ་ལྡན་ཀ་ལཱ་པར་འཇུག་པ་ཞེས་བྱ་བ། །ཐེག་པ་ཆེན་པོའི་ཐབས་ཆོས་ཀྱི་རྣམ་གྲངས་ཇི་སྙེད་པ་རྫོགས་སོ། །རྒྱལ་ཁམས་པ་ཏཱ་ར་ནཱ་ཐས་བལ་བོའི་དཔེ་ཡིས་བསྒྱུར་བ་སྟེ། །དོན་དཀའ་བ་དཀའ་བ་རྣམས་བྲམ་ཟེ་པཎྜི་ཏ་ཀྲྀའཥ་ཞེས་བྱ་བ་ལ་དྲིས་ཤིང་གཏན་ལ་ཕབ་སྟེ་ཞུས་དག་བྱས་པའོ།། ཞུས་སོ།། དགེ་ལེགས་འཕེལ། སརྦ་མངྒ་ལཾ།